Bakı Mühəndislik Universitetinin (BMU) tələbələri “42-ci ACM ICPC 2017-2018 NEERC” Tələbələrin Beynəlxalq Proqramlaşdırma Müsabiqəsinin yarımfinal mərhələsi və Cənubi Qafqaz Açıq Çempionatında müvəffəqiyyət qazanıblar.
BMU-dan bildirilib ki, Tələbələrin Beynəlxalq Proqramlaşdırma Müsabiqəsinin yarımfinal mərhələsi (komanda) və Cənubi Qafqaz Açıq Çempionatı (komanda və fərdi) Tbilisi şəhərində keçirilib.
Müsabiqədə Azərbaycandan 5 ali təhsil müəssisəsindən 10 komanda iştirak edib. Bakı Mühəndislik Universiteti 2, ADA Universiteti 3, Bakı Dövlət Universiteti 3, Bakı Ali Neft Məktəbi 1, Azərbaycan Universiteti 1 komanda ilə təmsil olunub. Hər komanda 3 tələbədən ibarət idi.
Proqramlaşdırma müsabiqəsinin yarımfinalında və Cənubi Qafqaz Açıq Çempionatında Azərbaycan, Rusiya, Belarus, Gürcüstan, Latviya, Litva, Estoniya, Qazaxıstan, Qırğızıstan, Özbəkistan və Ermənistanın ali təhsil müəssisələrindən 274 komanda iştirak edib. Müsabiqədə komandalara 5 saat ərsində 12 alqoritmik məsələnin proqramını tərtib etmək və avtomatik qiymətləndirmə sistemində sınaqdan keçirmək tapşırığı verilib. Komanda müsabiqəsində BMU-nun bir komandası “ACM ICPC 2017-2018” Azərbaycan Çempionu sertifikatına, “ACM ICPC 2017-2018” NEERC III dərəcəli sertifikata, Cənubi Qafqaz Açıq Çempionatının I dərəcəli diplomuna, iki komandası isə “ACM ICPC 2017-2018” NEERC fərqlənmə sertifikatına layiq görülüb.
Fərdi müsabiqədə 76 nəfər iştirak edib. Bakı Mühəndislik Universitetinin tələbələri Mahmud Allahverdiyev, Rəşad Məmmədov, Məmməd Hacılı Cənubi Qafqaz Açıq Çempionatının III dərəcəli diplomuna, Rəsul Kərimov, Asiman Ağayev, Tağı Əşrəfov Cənubi Qafqaz Açıq Çempionatının “Yüksək Nailiyyət Sertifikatı”nı qazanıblar.
Müsabiqədə iştirak etmiş tələbələr məzun olduqdan sonra informasiya texnologiyaları sektorunda dünyanın məşhur və aparıcı şirkətləri tərəfindən (Google, Amazone, IBM, Microsoft, Apple, Yandex, Facebook, Linkedin və s.) iş təklifi alırlar. Müsabiqə, həmçinin dünya universitetləri arasında bir yarışdır. Universitetlərin tanınması və təhsil səviyyəsinin (Kompüter elmləri və İT ixtisasları üzrə) göstəricisidir.
Qeyd edək ki, müsabiqənin birinci mərhələsində (1/4 mərhələsi) hər ölkə daxilində müvəffəqiyyət qazanan komandalar yarımfinal mərhələsinə vəsiqə qazanır. Yarımfinal mərhələsi müxtəlif regionlarda keçirilir və hər regiondan reytinqə görə müəyyən sayda komanda finala keçir. Ümumilikdə final mərhələsində 128-135 komanda (hər universitetdən yalnız bir komanda finala vəsiqə qazana bilir) iştirak edir. Bu il Pekində keçiriləcək final mərhələsində 12 medal (4 qızıl, 4 gümüş və 4 bürünc) uğrunda mübarizə aparılacaq.
