İnnovasiya və Rəqəmsal İnkişaf Agentliyi (İRİA) və qlobal oyun biznesində 20 illik təcrübəyə malik olan “Xsolla” şirkətinin əməkdaşlığı çərçivəsində Azərbaycanda oyun studiyaları üçün ilk inkubasiya proqramı — “IDDA — Xsolla Incubator Program”a qeydiyyat açıq elan edilib. Hibrid rejimdə keçiriləcək proqram 3 ay davam edəcək. Proqramda 3 qalib startap üçün 50, 75 və 100 min manatlıq pul mükafatı nəzərdə tutulub.
Yerli oyun studiyaları proqram ərzində kreativ sənayedə dayanıqlı biznes modelin qurulma strategiyası , qlobal bazarda rəqabət və şəbəkələşmə üzrə mentor dəstəyi, o cümlədən potensial investisiya imkanlarından faydalana biləcəklər. Bununla yanaşı, studiyalar dünya üzrə oyun sənayesində tanınmış ekspertlərdən fərdi mentorluq ala biləcəklər. Komandalar qlobal tədbirlərdə investorlar önündə uğurlu təqdimat sirlərinə, investisiya cəlbi məqsədilə optimal biznes strategiyanın hazırlanması kimi mühüm bacarıqlara yiyələnəcəklər.
İnkubasiya proqramına qeydiyyat 2025-ci il aprelin 18-dək davam edəcək. Hibrid rejimdə keçiriləcək proqram may – avqust ayları ərzində davam edəcək. Avqustda baş tutacaq təqdimatlar zamanı qalib komandalar elan ediləcək.
Proqrama müraciət etmək üçün aşağıdakı linkdən istifadə etmək mümkündür: Xsolla & IDDA — Azerbaijan Incubator Application
Proqram haqqında ətraflı məlumat İRİA-nın sosial media hesablarında vaxtaşırı paylaşılır.
