Azərbaycan Kibertəhlükəsizlik Təşkilatları Assosiasiyası (AKTA) tərəfindən təqdim olunmuş “İnformasiya təhlükəsizliyi ixtisası üzrə elmi-metodiki tədris vəsaitlərinin hazırlanması” layihəsi Azərbaycan Respublikasının Elm və Təhsil Nazirliyi tərəfindən həyata keçirilən “Təhsildə könüllü fəaliyyətin təşkili” qrant müsabiqəsinin qalibi olub.
Mütəxəssis hazırlığında tədrisin müasir standartlara uyğun aparılmasına dəstək vermək məqsədi daşıyan layihə çərçivəsində bakalavriat təhsil səviyyəsinin informasiya təhlükəsizliyi ixtisası üzrə təhsil proqramına uyğun olaraq, AKTA tərəfindən aidiyyəti mütəxəssislər cəlb edilməklə, “Kriptoqrafiyanın əsasları”, “Elektronika və IoT cihazlarının təhlükəsizliyi”, eləcə də “Sosial mühəndislik” fənləri üzrə sillabuslar və metodiki vəsaitlər, o cümlədən tədris vəsaitlərinin kontenti hazırlanacaq. Daha sonra, müvafiq ali təhsil müəssisələrində hazırlanmış materialların təqdimatı və təlimlər həyata keçiriləcək, habelə həmin materiallara əlçatanlıq təmin ediləcək. Qeyd olunmalıdır ki, 2024-cü ildə Azərbaycan Respublikası Elm və Təhsil Nazirliyinin dəstəyi ilə AKTA tərəfindən həyata keçirilmiş layihə çərçivəsində “Veb təhlükəsizlik”, “Şəbəkə təhlükəsizliyi” və “İnformasiya təhlükəsizliyi və kibertəhlükəsizliyin hüquqi aspektləri” fənləri üzrə tədris-metodiki vəsaitlər hazırlanıb və müvafiq ali təhsil müəssisələrinə təqdim edilib.
Elm və Təhsil Nazirliyi tərəfindən həyata keçirilən “Təhsildə könüllü fəaliyyətin təşkili” qrant müsabiqəsi ilə əlaqədar qeyd olunmalıdır ki, müsabiqəyə ümumilikdə 112 layihə təqdim olunub. Bütün layihələr əvvəlcə texniki ekspertiza mərhələsindən keçirilib və nəticədə 109-u məzmun qiymətləndirilməsi mərhələsinə buraxılıb. Məzmun qiymətləndirilməsi mərhələsində layihələr 100 ballıq şkala ilə 9 meyar əsasında qiymətləndirilib. Bu mərhələnin sonunda ən yüksək bal toplayan layihələr Azərbaycan Respublikası Prezidentinin 21 oktyabr 2015-ci il tarixli 652 nömrəli fərmanına uyğun olaraq Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi və Azərbaycan Respublikasının Gənclər Fondu ilə razılaşdırılıb. Nəticə olaraq, qeyri-hökumət təşkilatları tərəfindən daxil olmuş 15 layihəyə qrant ayrılıb.
