İnnovasiya və Rəqəmsal İnkişaf Agentliyi (İRİA) və “ICPC Foundation” arasında görüş baş tutub. Görüşdə Bakı şəhərində keçiriləcək Beynəlxalq Universitetlərarası Proqramlaşdırma Müsabiqəsinin (ICPC) dünya finalına hazırlıq mərhələsi, görüləcək işlər barədə fikir mübadiləsi aparılıb.
İRİA-nın sədri Fərid Osmanov sözügedən müsabiqənin ölkənin rəqəmsallaşma və innovasiya sahəsində inkişafına və qlobal nüfuzunun artırılmasına verəcəyi töhfələrdən bəhs edib. Daha sonra ICPC 2025 Dünya Finalı üzrə direktor Fuad Hacıyev, “ICPC Foundation” nın Əməliyyatlar üzrə direktoru Matvey Kazakov və “ICPC Foundation” nın İnkişaf üzrə direktoru Veronika Soboleva müsabiqənin dünya finalının Qafqazda ilk dəfə Bakıda keçiriləcəyini vurğulayaraq İRİA ilə bu sahədə əməkdaşlığın inkişaf perspektivlərindən bəhs ediblər. Görüşdə finalçı komandaların hazırlığına cari ilin aprel ayında başlanacağı qərarlaşdırılıb.
Qeyd edək ki, dünyanın ən nüfuzlu proqramlaşdırma yarışlarından biri hesab olunan müsabiqənin finalı “ICPC Foundation” təşkilatçılığı və ADA Universitetinin ev sahibliyi, Azərbaycan Respublikasının Mərkəzi Bankının tərəfdaşlığı, İnovasiya və Rəqəmsal İnkişaf Agentliyi ilə “ICPC Azərbaycan” icmasının birgə əməkdaşlığı ilə baş tutacaq.
Dünya finalı 31 avqust – 5 sentyabr 2025-ci il tarixlərində keçiriləcək.
İRİA 2024-cü ildən etibarən “ICPC Azərbaycan”ı dəstəkləyərək ADA Universiteti ilə birgə lokal yarışlar, düşərgələr, təlim proqramları təşkil edir.
