“Apple” korporasiyası ötən ilin yayında dostu ilə birlikdə Bermud üçbucağı zonasında itkin düşmüş Ostin Stefanos adlı yeniyetmənin “iPhone”undakı məlumatları bərpa edə bilməyib. “tjournal.ru” saytının məlumata görə, “Apple” mütəxəssisləri O. Stefanosun “iPhone”unu sökərək onun detallarını təmizləyiblər və kimyəvi emalını həyata keçiriblər, lakin smartfonu işə salmaq və içərisindəki məlumatları əldə etmək mümkün olmayıb.O. Stefanosun atası Blu Stefanos “Apple”a təşəkkür edərək oğlunun smartfonunu xatirə kimi saxlamaq istədiyini deyib. Lakin itkin düşən Perri Koen adlı digər yeniyetmənin anası bildirib ki, informasiyanın bərpası sahəsində başqa mütəxəssislər də var və o, axtarışı davam etdirmək fikrindədir: “Perri üçün mən bütün mümkün variantları yoxlamalıyam. “Apple”dan bildirdilər ki, bu sahədə başqa mütəxəssislər də var və onlar informasiyanın bərpasında kömək göstərə bilər. Biz təslim olmuruq və bütün variantlardan istifadə etmək istəyirik”.
Qeyd edək ki, 14 yaşlı Ostin Stefanos və Perri Koen 2015-ci il iyulun 24-də itkin düşüblər. Onlar qayıqla Floridanın şərq sahilində balıq tutmağa gediblər, lakin fırtınaya düşüblər. Yeniyetmələrin axtarışı bir həftə davam etsə də, onların izinə rast gəlinməyib. Martın 18-də Norveç gəmisi Bermud adalarından təxminən 100 mil aralıda yeniyetmələrin qayığını tapıb. Qayığın tapılması Ostin və Perrinin başına nə gəldiyini müəyyənləşdirməyə kömək etməyib, lakin qayıqda Stefanosa məxsus “iPhone 6” aşkarlanıb. Smartfonun içərisindəki informasiya sirli olayın təfərrüatlarına işıq sala bilər.
