Cənubi Koreyanın “Samsung” şirkətinin “Galaxy Note 7” smartfonlarının istehsalını dayandırmasından sonra onun bazardakı əsas rəqibi, ABŞ-ın “Apple” korporasiyasının səhmlərinin dəyəri 2016-cı il ərzində ən yüksək səviyyəyə qalxıb.İKT.lent.az-ın “Bloomberg HT” saytına istinadən verdiyi xəbərə görə, yaranmış vəziyyətdə “Apple”ın proqnozlaşdırılandan xeyli artıq “iPhone” satacağı gözlənilir. Hələ “Samsung”un istehsalı dayandırmaq qərarından əvvəl “S&P” analitiki Angelo Zino “Note 7”dəki problemlərin bəzi “Android” istifadəçilərini “iOS”a keçməyə sövq edəcəyini və bunun nəticəsində “Apple”ın bazar payının 1% həcmində yüksələ biləcəyini söyləyib. İDC şirkətinin məlumatına əsasən “Samsung” II rüb etibarilə 22,4% bazar payına malik olub və bu, “Apple”ın 11,8%-lik bazar payının iki qatıdır. A. Zino cari rübdə “Aplle”ın əlavə 14-15 milyon ədəd “iPhone” sata biləcəyini proqnozlaşdırıb: “ABŞ-dakı böyük telefon operatorları “Note 7” satışlarını dayandırıb. Müştərilər bu məhsulu başqa məhsulla dəyişə bilər. “Apple”ın mənafeyi baxımından daha sərfəli rəqabət mühiti yaranacağını və önümüzdəki 12-18 ayda daha çox “Android” istifadəçisinin “Apple”ın əməliyyat sisteminə keçəcəyini təxmin edirik”.
A. Zino “Note 7” telefonlarında yaşanan problemin “Samsung”un bundan sonrakı məhsullarına da mənfi təsir göstərəcəyini düşünür.
