Bu gün Azərbaycan Milli Elmlər Akademiyası (AMEA) və Türkiyənin Erciyes Texnoparkı arasında əməkdaşlığa dair ilkin razılaşma sənədi imzalanıb. AMEA-nın mətbuat xidmətindən verilən xəbərə görə, görüşdən əvvəl dünən Ankarada baş vermiş terror aktının qurbanlarının xatirəsi bir dəqiqəlik sükutla yad edilib, AMEA rəhbərliyi adından türkiyəli qonaqlara başsağlığı verilib.
Görüşdə çıxış edən AMEA Rəyasət Heyəti aparatının İnnovasiya şöbəsinin rəisi, aqrar elmlər üzrə fəlsəfə doktoru Vüqar Babayev bildirib ki, AMEA ilə Erciyes Texnoparkı arasında səmərəli əməkdaşlıq əlaqələri AMEA Rəyasət Heyəti aparatının İnnovasiya şöbəsinin təşəbbüsü ilə 2014-cü ildə qurulub və bu əlaqələrin davamı olaraq innovasiya fəaliyyətinin təkmilləşdirilməsi istiqamətində Niyyət Sazişi və əməkdaşlıq müqaviləsi imzalanıb.
V. Babayev qeyd edib ki, Niyyət Sazişi çərçivəsində tərəflər arasındakı əməkdaşlıq AMEA-da texnologiyaların transferi funksiyasının həyata keçirilməsi, AMEA Elm və Texnologiya Parkının yaradılması, AMEA inkubasiya proqramının hazırlanması, eləcə də Avropa Birliyinin çərçivə proqramlarında birgə layihələrlə iştirak edilməsi kimi məsələləri əhatə edəcək.
Erciyes Texnoparkının baş direktorunun müavini Selahettin Gönülateş AMEA-da keçirilən bu görüşdən məmnunluğunu ifadə edərək təmsil etdiyi texnopark haqqında məlumat verib: “2007-ci ildə qurulmuş Erciyes Texnoparkı müxtəlif sahələrdə fəaliyyət göstərir. Türkiyənin 5-ci böyük texnoparkıdır. Texnoparkımız 217 min kvadrat metr açıq, 30,5 min kvadrat metr qapalı əraziyə sahibdir. Texnoparkda 203 bina mövcuddur. Buradakı firmaların əksəriyyəti öz fəaliyyətlərini beynəlxalq, iqtisadi münasibətlər və texnoloji sahələr üzərində qurublar. Enerji, kimya və qida sənayesi ilə məşğul olan şirkətlər də var”.
S. Gönülateş bildirib ki, tərəflər arasında imzalanacaq əməkdaşlıq müqaviləsi 2016-cı ilin sentyabr ayında Türkiyənin Nevşehir şəhərində kosmik sənaye mövzusunda təşkil ediləcək beynəlxalq tədbirin birgə koordinasiyası barədədir. O qeyd edib ki, müqaviləyə əsasən, AMEA və Erciyes Texnoparkı tədbirin təşkilat komitəsi və məşvərət şurasında birgə iştirak edəcək, adıçəkilən tədbirin hər iki ölkədə təbliğ və təşviqini həyata keçirərək tədbirin koordinasiya işlərini birlikdə icra edəcəklər.
Sənədləri Akademiya tərəfdən AMEA Rəyasət Heyəti aparatının İnnovasiya şöbəsinin rəisi V. Babayev, Erciyes Texnoparkı tərəfdən isə Erciyes Texnoparkının baş direktorunun müavini S. Gönülateş imzalayıb.
İmzalanma mərasimindən sonra AMEA prezidenti, akademik Akif Əlizadə S. Gönülateş və SERA İnkubasiya Mərkəzinin rəhbəri Mehmet Yağcıoğlunu qəbul edib. Görüşdə gələcək planlar və əməkdaşlıq imkanları müzakirə olunub.
