9-14 fevral 2025-ci il tarixlərində Niderland Krallığının Amsterdam şəhərində keçirilən «Cisco Live» texnologiya tədbiri dünyanın ən prestijli və nüfuzlu texnologiya tədbirlərindən biri olaraq, Azərbaycanın dövlət və özəl sektorunun 80-dən çox nümayəndəsindən ibarət heyəti bir araya gətirib. Tədbirdə COP29 Azərbaycan Əməliyyat Şirkətinin İT Departamentinin nümayəndələri ilə yanaşı, Azərbaycan Kibertəhlükəsizlik Təşkilatları Assosiasiyasının (AKTA) üzvləri – “All in One Technologies” və “Cyberpoint” şirkətləri də təmsil olunur.
“Cisco Live” – Cisco şirkətinin hər il təşkil etdiyi və texnologiya mütəxəssisləri, İT rəhbərləri, mühəndislər və Cisco məhsullarından istifadə edən müştərilər üçün nəzərdə tutulan beynəlxalq bir tədbirdir. Tədbirin əsas məqsədi iştirakçıları texnoloji yeniliklərlə tanış etmək, Cisco məhsulları və həlləri haqqında onları məlumatlandırmaq, eyni zamanda “Cisco Live Awards” qaliblərinin uğur hekayələrini paylaşmaqdır.
COP29 və Azərbaycan İKT infrastrukturunun uğurlu təsviri
“Cisco Live” çərçivəsində həm də COP29 tədbirinin Azərbaycanda yüksək peşəkarlıqla həyata keçirilməsi və bu tədbir çərçivəsində yerli mütəxəssislərin cəlb edilməsi ilə qısa zamanda beynəlxalq standartlara cavab verən İKT infrastrukturunun uğurla qurulması və təhlükəsizliyinin təmin olunması beynəlxalq ictimaiyyətə təqdim edilmişdir. Tədbirdə Azərbaycanın yüksək texnologiya sahəsindəki uğurları, eləcə də “All in One Technologies” və “Cyberpoint” şirkətlərinin verdiyi mühüm töhfələr bir daha dünya səviyyəsində tanıdılmışdır.
“Cisco Live” tədbirinin əsas mərasimlərindən biri də «Davamlı İnkişaf Lideri Mükafatı»nın təqdimatıdır. BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası tədbiri — COP29 Azərbaycan Əməliyyat Şirkəti qalib seçilərək müvafiq mükafatla təltif olunmuşdur. Qeyd edək ki, yalnız yüksək texnologiyalar sənayesində davamlı inkişafı dəstəkləyən və innovativ həllər təqdim edən layihələr bu mükafatla təltif olunur.
“Cisco Live” tədbiri Azərbaycanın İKT sahəsindəki uğurlarını və innovativ həllərini təqdim etmək üçün əvəzolunmaz bir fürsət təqdim edib. COP29 İT komandası, o cümlədən “All in One Technologies” və “Cyberpoint” şirkətlərinin bu mühüm əməkdaşlıq və uğurları, Azərbaycanın dünya texnologiya arenasında güclü bir lider kimi tanınmasına töhfə vermişdir.
