Media, ödənişlər və təhsil sahələrinin kəsişməsində innovasiyalar yaradan qlobal rəqəmsal ekspertlər şəbəkəsi “Aleph” və Azərbaycanın ən fəal kreativ və marketinq icması olan “Baku Flames” Beynəlxalq Yaradıcılıq və Effektivlik Festivalı birgə şəkildə eksklüziv “Marketinq Liderlərinin İlsonu Görüşü”nü təşkil etdilər. Tədbir çərçivəsində sənaye liderləri 2026-cı ildə baş tutacaq “Baku Flames” festivalının çoxdan gözlənilən konspeti ilə tanış oldular: “Human After All”.
Agentlik rəhbərləri, marketoloqlar və sahə üzrə ekspertlər 2026-cı ilin rəqəmsal mənzərəsinə həsr olunmuş gələcəyə dair müzakirə üçün bir araya gəldilər. Belə ki, müzakirələr bazardakı əsas dəyişikliklərə, yeni imkanlara və qarşıdakı ildə sənayeni formalaşdıracaq trendlərə, eləcə də uğura aparan agentlik–brend əməkdaşlığının təkamülünə fokuslanmışdı. Tədbirin diqqətçəkən məqamlarından biri “Aleph”in Azərbaycanda rəsmi reselleri olduğu “TikTok” platformasına həsr olunmuş xüsusi təqdimat oldu. Təqdimatda yerli yaradıcılıq və rəqəmsal mədəniyyət vasitəsilə biznes nəticələrinin necə gücləndirilə biləcəyi də nümayiş etdirildi.
“Baku Flames”in həmtəsisçisi və rəhbəri Orxan Kərim qeyd edib:
“Baku Flames”i yaradarkən biz onu heç vaxt sadəcə mükafat mərasimi və ya festival kimi görməmişik. İlk gündən ambisiyamız daha böyük idi. Biz regionumuzu böyütmək, brendlərimizi, agentliklərimizi, kreativlərimizi və ən əsası öz istedadlarımızı inkişaf etdirmək istədik. Onlara səhnə, münsiflər kürsüsündə yer və parlaq olmaq üçün özünəinam qazandırmaq məqsədimiz vardı. Bu gün böyük holdinqlər və qlobal brendlərlə əməkdaşlıq edərkən və “Aleph” ilə birlikdə ilin sonu sənaye liderləri görüşünü təşkil edərkən, həmin ilkin vizyonun nə qədər real olduğunu bir daha hiss edirik”.
“Aleph Azerbaijan”ın icraçı direktoru Tural Kərimov isə tədbirin uğurunu belə şərh edib:
“Bu tədbirdə məqsədimiz marketinq liderlərini bir araya gətirərək 2026-cı il üçün həqiqətən önəmli olan mövzular üzərində düşünmək üçün mühit yaratmaq idi. Bu görüş sadəcə slaydlardan və datalardan ibarət deyildi. Bu tədbirdə insanların, fərqli fikirlərin və cəsarətli əməkdaşlığın toqquşmasını gördük. Bu, sadəcə təqdimat deyil, bütün sənayemizi irəli aparmağa yönəlmiş strateji dialoqdur. Biz marketinqin gələcəyini kənardan izləməkdənsə, tərəfdaşlarımızla birlikdə onu formalaşdırmağa çağırırıq”.
Analitik məzmundan əlavə tədbir interaktiv təcrübələr və “peer-to-peer” dialoq vasitəsilə yeni əlaqələrin və cəsarətli ideyaların yaranmasına da təkan verir, həmçinin “Aleph” və “Baku Flames” yerli reklam bazarının sərhədlərini genişləndirməyə davam edir. Qonaqlardan alınan rəylər isə bir daha göstərir ki, Azərbaycan bazarının belə yüksək səviyyəli tədbirlərə ehtiyacı var və bu cür əhəmiyyətli görüşlərin davamlı keçirilməsi artıq zərurətdir.
