Maliyyə Bazarlarına Nəzarət Palatası “GoldenPey” şirkətinin səhmlərinin ilkin kütləvi yerləşdirilməsinin (İPO) baş tutmamasının səbəblərini açıqlayıb.Palatanın Direktorlar Şurasının sədri Rüfət Aslanlı “Marja”ya bildirib ki, “QoldenPey” ASC-nin İPO-sunun reallaşmamasına o vaxt Komitə dəstək verməyib:
“Listinq Məsləhət Proqramı çərçivəsində bir neçə şirkət səhmlərinin ilkin kütləvi satışını (İPO) həyata keçirməyi nəzərdə tuturdu. Bunun üzərində iş gedirdi. Bazara çıxmaq istəyən ambisiyalı, potensial emitent də var idi (“QoldenPey” ASC-ni nəzərdə tutur). Səmimi deyim ki, həmin İPO-nun reallaşmasına o zamankı Qiymətli Kağızlar üzrə Dövlət Komitəsi dəstək vermədi. Çünki bazara çıxan ilk İPO uğurlu olmalı idi. Emitentin bazardan gözləntisi əsassız olaraq çox nikbinlik idi. Buna izafi nikbinlik də demək olar. İkincisi iqtisadi poseslər və təhdidlər yetərincə nəzərə alınmamışdı. Üçüncüsü də emitentin prospekti “çılğınlıq” xarakterində idi. Biz sonra emitent ilə uzun müddət iş apardıq ki, daha realist bir iş ortaya qoyaq. Daha sonra isə qlobal əmtəə bazarlarında baş verən proseslər bu İPO-nun bir müddət təxirə salınmasını səbəb oldu”.
Rüfət Aslanlı qeyd edib ki, Palata nikbindir, yaxın və orta perspektivdə Azərbaycanda ilk İPO baş tutacaqdır.
Qeyd edək ki, “QoldenPey” şirkəti Hesab.az portalının sahibidir.
