Mayın 6-da Almaniyanın Leypsiq şəhərində Azərbaycanın prezidentliyi ilə Beynəlxalq Nəqliyyat Forumunun (BNF) Sammiti işə başlayıb.
Builki sammit “Dayanıqlı nəqliyyatın maliyyələşdirilməsi” mövzusuna həsr edilib. İqlim dəyişikliyi, urbanizasiya və texnoloji yeniliklər fonunda bu mövzu böyük əhəmiyyət daşıyır.
Açılış mətbuat konfransında çıxış edən rəqəmsal inkişaf və nəqliyyat naziri Rəşad Nəbiyev bu il 20 illiyini qeyd edən Beynəlxalq Nəqliyyat Forumuna sadiq tərəfdaşlığa və tədbirin mükəmməl təşkilinə görə minnətdarlığını bildirib. Həmçinin bütün üzv ölkələrə və tərəfdaşlara fəal iştiraklarına və ortaq nəqliyyat gündəliyinin inkişafına göstərdikləri dəstəyə görə təşəkkür edib. Vurğulanıb ki, Azərbaycan BNF-yə sədrliyi tərəfdaşlıq ruhunda həyata keçirərək təşkilatın daha güclü və inklüziv platformaya çevrilməsi istiqamətində fəaliyyət göstərib.
Nazir əlavə edib ki, Azərbaycanın sədrliyi dövründə təşkilatın institusional fəaliyyətinin səmərəliliyinin artırılmasına da xüsusi diqqət yetirilib, üzv ölkələrlə konstruktiv əməkdaşlıq nəticəsində İş Proqramı üzrə razılıq əldə olunub. Ölkəmizin BNF çərçivəsində konstruktiv və nəticəyönümlü əməkdaşlığa sadiq qaldığı vurğulanıb. 
Sammit çərçivəsində “The Price of Resilience: Why It Pays, Why It’s Hard?” adlı açılış plenar iclası öz işinə başlayıb.
Açılış hissəsində Azərbaycanın zəngin mədəni irsini və müasir inkişafını əks etdirən videoçarx nümayiş olunub. Videoçarxda ölkəmizin tarixi, multikultural dəyərləri, sürətlə inkişaf edən şəhər infrastrukturu və nəqliyyat-logistika potensialı vizual olaraq təqdim edilib. Ardınca iştirakçılara Azərbaycanın milli musiqi ənənələrini əks etdirən musiqi proqramı təqdim olunub. Canlı ifada səsləndirilən milli musiqi nümunələri tədbirə xüsusi ab-hava qataraq qonaqlarda ölkəmizin mədəniyyətinə dair dərin təəssürat formalaşdırıb.
Plenar iclas nəqliyyat sektorunda dayanıqlılığın əhəmiyyətinə və onun iqtisadi sabitlik, əlaqəlilik və uzunmüddətli risklərin azaldılmasında oynadığı rola həsr olunub.
Tədbirin açılışında çıxış edən rəqəmsal inkişaf və nəqliyyat naziri Rəşad Nəbiyev Beynəlxalq Nəqliyyat Forumunun dialoq, praktik əməkdaşlıq və kollektiv irəliləyiş üçün əhəmiyyətini vurğulayıb.
Nazir qeyd edib ki, “Dayanıqlı nəqliyyatın maliyyələşdirilməsi” mövzusu infrastrukturun davamlı olması və dəyişən tələblərə uyğunlaşması üçün düzgün və balanslı investisiyaların əhəmiyyətini önə çıxarır. Bu prosesdə resursların düzgün bölüşdürülməsi və müasir texnologiyaların tətbiqi uzunmüddətli xərcləri azaldaraq nəqliyyat sistemlərinin effektivliyini artırmağın əsas yoludur. 
Azərbaycanın sədrliyə daha praktik və nəticəyönümlü yanaşdığını deyən nazir diqqətə çatdırıb ki, strateji prioritetlərin konkret mexanizmlərlə dəstəklənməsinə xüsusi diqqət yetirilib. Sədrlik dövründə əsas istiqamətlər beynəlxalq nəqliyyat əlaqələrinin gücləndirilməsi, BNF-nin inklüziv dialoq platforması kimi möhkəmləndirilməsi, siyasət çərçivələrinin təkmilləşdirilməsi, iştirakın genişləndirilməsi və institusional davamlılığın təmin edilməsi olub.
Sammit iştirakçılarına Azərbaycanın nəqliyyat sektorunun dayanıqlılığını və səmərəliliyini artırmaq məqsədilə həyata keçirdiyi təşəbbüslər, o cümlədən Orta Dəhliz üzrə əsas infrastruktur layihələri barədə də məlumat verilib. Bildirilib ki, infrastrukturla yanaşı, rəqəmsal sistemlərə də ciddi investisiyalar yatırılıb. Bütün bu addımlar nəqliyyat investisiyalarının uzunmüddətli dəyər yaratmasını və dayanıqlı iqtisadi inkişafı dəstəkləməsini təmin etmək məqsədi daşıyır.
Sammit çərçivəsində Beynəlxalq Nəqliyyat Forumu tərəfdaşlarının məhsul, xidmət və innovativ təşəbbüslərinin təqdim olunduğu sərgi də təşkil edilib. Sərgidə Azərbaycan milli stendlə təmsil olunur.
Beynəlxalq Nəqliyyat Forumunun Baş katibi Yonq Te Kim, Almaniyanın federal nəqliyyat naziri Patrik Şnayder, eləcə də sammitdə iştirak edən digər nazirlər və nümayəndə heyətlərinin rəhbərləri Azərbaycan stendi ilə tanış olublar.
Ziyarətçilərə ölkəmizin nəqliyyat sektorunda əldə etdiyi mühüm nailiyyətlər və perspektivli təşəbbüslər barədə ətraflı məlumat verilir. Bu təqdimat müxtəlif ölkələrin rəsmiləri, beynəlxalq investorlar və texnologiya ekspertləri ilə birbaşa əlaqələrin qurulmasına, həmçinin innovativ həllərin yerində araşdırılmasına əlverişli imkan yaradır.
Günün sonunda Azərbaycan adından iştirakçılara ölkəmizin zəngin mədəni irsini, milli musiqisini və rəqs nümunələrini əks etdirən bədii proqram təqdim olunub.
