Alaqoas Ştatının Braziliya İstehlakçıların Hüquqlarının Müdafiəsi İnstitutu (Procon-AL) Apple şirkətini enerji adapterləri olmayan iPhone satdığına görə 101.627.50 R$ (təxminən 20.000 dollar) cərimələdi. Agentlik bunu «məhsulun müntəzəm istifadəsi üçün zəruri əşya» adlandırdı.
Tənzimləyici orqan iddia edir ki, Apple şirkətinin ölkədə enerji adapterləri olmayan iPhone təklif etmək qərarı Braziliyanın İstehlakçıların Hüquqlarının Müdafiəsi Məcəlləsini pozur.
«Bizim qiymətləndirməmizə görə, məhsulun düzgün istifadəsi üçün zəruri olan ayrı bir əşyanın alınması yükünü istehlakçıya həvalə etməklə şirkət obyektiv vicdanlılıq, şəffaflıq və istehlakçıların hüquqlarının müdafiəsi prinsiplərini pozur»- deyə Procon-AL bildirib.
Procon-AL əvvəlcə təxminən 12.000 dollar cərimə tətbiq etdi, lakin sonradan Braziliya qanunvericiliyinə əsasən ağırlaşdırıcı hallar və Apple şirkətinin şikayəti həll etmək öhdəliyinin olmaması səbəbindən bu məbləği təxminən 20.000 dollara qədər artırdı.
Bu, Apple şirkətinin Braziliyada iPhone-lara şarj cihazı əlavə etməməsi ilə bağlı problemlərlə qarşılaşdığı ilk hal deyil. 2022-ci ildə Braziliya Ədliyyə Nazirliyi bu səbəbdən ölkədə iPhone satışlarının dayandırılmasını əmr etmişdi. Bir il əvvəl Apple oxşar təcrübəyə görə təxminən 2 milyon dollar cərimə olunmuşdu.
Xəbər verildiyi kimi, Apple Brazil şirkətinin Procon-AL qərarından apelyasiya şikayəti vermək üçün 20 günü var. Apelyasiya rədd edilərsə, cərimə Braziliyanın IPCA-E inflyasiya indeksinə uyğun olaraq tənzimlənəcək.
