Bu gün Qahirə şəhərində Azərbaycan Respublikası və Misir Ərəb Respublikası arasında Hökumətlərarası iqtisadi, texniki və elmi əməkdaşlıq üzrə Müştərək Komissiyanın 6-cı iclası keçirilib.
Müştərək Komissiyanın Misir Ərəb Respublikası tərəfindən həmsədri, bu ölkənin planlaşdırma, iqtisadi inkişaf və beynəlxalq əməkdaşlıq naziri Raniya Al-Maşat Azərbaycan nümayəndə heyətini salamlayaraq bildirib ki, Azərbaycan və Misir inkişaf edən iqtisadi və mədəni əlaqələrə malik ölkələrdir və müxtəlif sahələr üzrə əməkdaşlığın daha da genişləndirilməsi üçün potensial mövcuddur.
İclasda Müştərək Komissiyanın Azərbaycan Respublikası tərəfindən həmsədri, rəqəmsal inkişaf və nəqliyyat naziri Rəşad Nəbiyev ölkəmizin ötənilki makroiqtisadi göstəriciləri və iki ölkə arasında ticarət dövriyyəsinin həcmi barədə məlumat verib, Müştərək Komissiyanın tərəflər arasında əməkdaşlığın genişləndirilməsi üçün səmərəli platforma olduğunu vurğulayıb.
Eyni zamanda qeyd olunub ki, Azərbaycan – Misir Biznes Şurasının fəaliyyətinin aktivləşdirilməsi iki ölkə arasında ticarət əlaqələrinin inkişafına öz töhfəsini verə bilər.
Rəşad Nəbiyev, həmçinin regionda sülh quruculuğu ilə bağlı cari vəziyyət, postmünaqişə sülh gündəliyi, habelə işğaldan azad edilmiş Azərbaycan ərazilərində aparılan yenidənqurma və bərpa işlərindən danışıb. Diqqətə çatdırılıb ki, işğaldan azad edilən ərazilər yenidən qurulur və bu region “yaşıl enerji” zonası elan olunub.
Nazir, həmçinin Azərbaycanda nəqliyyat və rəqəmsal inkişaf sahələrində həyata keçirilən işlər, eləcə də Orta Dəhlizlə inkişaf etdirilməsi üçün görülən tədbirlər haqqında Misir tərəfinə ətraflı məlumat verib.
İclas zamanı qarşılıqlı investisiyalar, ticarət, qida sənayesi və kənd təsərrüfatı, energetika, nəqliyyat, rəqəmsal inkişaf və İKT, elm və təhsil, səhiyyə, mədəniyyət, turizm, gənclər və idman sahələrində əməkdaşlıq imkanlarına dair geniş müzakirələr aparılıb.
İclasın sonunda Azərbaycan Respublikası və Misir Ərəb Respublikası arasında Hökumətlərarası iqtisadi, texniki və elmi əməkdaşlıq üzrə Müştərək Komissiyanın 6-cı iclasının Protokolu imzalanıb.
Qeyd edək ki, Müştərək Komissiya 1994-cü ilin 7 aprel tarixində Qahirə şəhərində imzalanmış “Azərbaycan Respublikası Hökuməti və Misir Ərəb Respublikası Hökuməti arasında iqtisadi və elmi-texniki əməkdaşlıq haqqında Saziş”ə əsasən yaradılıb.
