“Kommunal xidmətlərlə bağlı Vahid İnformasiya Sisteminin yaradılması və aidiyyəti sistemlərin inteqrasiyası üzrə 2025-ci il üçün Yol Xəritəsi” Biznes mühiti və beynəlxalq reytinqlər üzrə Komissiyanın sədri, Baş nazirin müavini Samir Şərifov tərəfindən təsdiq edilib.
Yol Xəritəsi kommunal xidmətlər sektorunun daha effektiv idarə olunması, kommunal xidmətlərə əlçatanlığın yaxşılaşdırılması və ölkəmizin beynəlxalq reytinqlərdə mövqeyinin daha da yüksəldilməsi üzrə təşkilati və inzibati tədbirləri əhatə edir. Onun icrası çərçivəsində kommunal qurumların inteqrasiyası, vahid abunəçi kodu mexanizminin tətbiqi, məlumat bazalarının təkmilləşdirilməsi və elektron xidmətlərin «mygov» rəqəmsal hökumət platformasına inteqrasiyası nəzərdə tutulur.
Yol Xəritəsinə əsasən, Rəqəmsal İnkişaf və Nəqliyyat Nazirliyi tərəfindən kommunal operatorlara aid xidmətlərin (vətəndaş yönümlü xidmətlər) 50%-nin və müvafiq bildirişlərin “MyGov” üzərindən göndərilməsinə imkanlar yaradılacaqdır.
Sənədə müvafiq olaraq, “Azərişıq” ASC tərəfindən “Kommunal Xidmətlər Vahid İnformasiya Sisteminin formalaşdırılması ilə bağlı konseptual sənəd”in layihəsinin və texniki tapşırığın hazırlanması, kommunal sahə üzrə göstərilən xidmətlərin mövcud və təklif edilən iş axınlarının müəyyən olunması və vizuallaşdırılması təmin edilərək, digər aidiyyəti icraçı qurumlar yaxından cəlb olunmaqla müvafiq işlərin 2025-ci ilin 1 iyul tarixinədək yekunlaşdırılması nəzərdə tutulur.
Bununla yanaşı, sistem abonentlərə kommunal xidmətlərlə bağlı məlumatları vahid platformadan əldə etməyə və ödənişləri daha rahat həyata keçirməyə imkan verəcək. Layihə aidiyyəti dövlət qurumlarının iştirakı ilə həyata keçirilir və 2025-ci ilin sonuna qədər əsas mərhələlərinin tamamlanması planlaşdırılır.
“Kommunal xidmətlərlə bağlı Vahid İnformasiya Sisteminin yaradılması və aidiyyəti sistemlərin inteqrasiyası üzrə” 2025-ci il üçün Yol Xəritəsinin tam mətni Komissiyanın internet portalında yer alıb.
Qeyd edək ki, Komissiyanın “Texnologiya və innovasiyalar” işçi qrupunun tərkibində “Kommunal xidmətlərlə bağlı Vahid İnformasiya Sisteminin yaradılması üzrə” altqrupuna rəhbərliyi Rəqəmsal İnkişaf və Nəqliyyat Nazirliyi tabeliyində İnnovasiya və Rəqəmsal İnkişaf Agentliyi həyata keçirir.
