İnnovasiya və Rəqəmsal İnkişaf Agentliyi (İRİA) ilə İtaliyanın telekommunikasiya və texnologiya sektorunda aparıcı şirkəti olan “Telecom Italia” arasında əməkdaşlığa dair Anlaşma Memorandumu imzalanıb. Bu strateji əməkdaşlıq innovasiya, kibertəhlükəsizlik və rəqəmsallaşma üzrə ölkəmizdə həyata keçirilən təşəbbüslərin Avropa təcrübəsi ilə təkmilləşdirilməsini nəzərdə tutur.
Belə ki, İRİA və “Telecom Italia” arasında baş tutan görüşlərdə əməkdaşlığın müxtəlif perspektivləri, xüsusilə də italyan texnologiya şirkətinin Azərbaycan bazarında potensialı müzakirə edilib. Bununla yanaşı, əməkdaşlıq çərçivəsində layihələrin effektiv idarə edilməsi məqsədilə rəhbər komitə də təsis edilib.
İRİA-nın sədr müşaviri Salar İmaməliyev bildirib ki, bu tərəfdaşlıq Azərbaycanda rəqəmsal transformasiyanın inkişafına töhfə baxımından böyük əhəmiyyət kəsb edir: “Şirkətin texnoloji imkanları genişdir. Bu bizə imkan verəcək ki, səylərimizi birləşdirək və Azərbaycanda rəqəmsallaşmanın sürətlənməsi, eləcə də ölkəmizin regionda innovativ inkişaf üzrə lider mövqeyinə yüksəlməsi yolunda mühüm layihələr həyata keçirək”.
Görüşdə iştirak edən “Telecom Italia” şirkətinin ictimaiyyətlə əlaqələr, təhlükəsizlik və beynəlxalq biznes üzrə rəhbəri Eugenio Santagata tərəfdaşlığın strateji cəhətdən yüksək dəyər kəsb etdiyini vurğulayıb: “Biz Avropada kibertəhlükəsizlik və kvant texonologiyası kimi kritik önəm daşıyan sahələrdə lider mövqeyini tutan şirkətlərdənik. Bu əməkdaşlıq da onu göstərir ki, qabaqcıl təcrübəmizi Azərbaycana gətirmək və bu ölkənin texnoloji inkişafına güclü töhfə vermək niyyətindəyik”.
Qeyd edək ki, memorandum İRİA-nın sədr müşaviri Salar İmaməliyev və “Telecom Italia” şirkətinin ictmaiyyətlə əlaqələr, təhlükəsizlik və beynəlxalq biznes üzrə rəhbəri Eugenio Santagata tərəfindən imzalanıb. İmzalanma mərasimində, hər iki qurumun rəhbər heyəti, həmçinin İtaliya Respublikasının Azərbaycandakı fövqəladə və səlahiyyətli səfiri Luka Di Canfrançesko da iştirak edib. 
