Azərbaycanın telekommunikasiya və poçt xidmətləri üzrə tənzimləyici qurumu İnformasiya Kommunikasiya Texnologiyaları Agentliyi (İKTA) tərəfindən elan edilmiş “Rəqəmsal dövrdə internet xidmətlərinin tənzimlənməsi” mövzusunda yazı müsabiqəsində iştirak üçün qeydiyyatdan keçmiş iştirakçılarla görüş keçirilib.
Görüş zamanı iştirakçılara müsabiqənin mahiyyəti haqqında ətraflı məlumat verilib, şərtlər bir daha diqqətə çatdırılıb. Görüş çərçivəsində, eyni zamanda birinci mərhələdən uğurla qeydiyyatdan keçmiş müsabiqə iştirakçılarının sualları cavablandırılıb.
İKTA rəsmiləri qeyd edib ki, müsabiqənin keçirilməsində əsas məqsəd ölkəmizdə internet telekommunikasiya xidməti sahəsində tənzimləyici çərçivənin mövcud statusu barədə media nümayəndələrinin, ekspertlərin, eləcə də geniş auditoriyanın məlumatlandırılması və maarifləndirilməsidir.
Bildirilib ki, müsabiqə iştirakçıları seçdikləri mövzular üzrə qarşılaşdıqları çətinliklərlə bağlı müxtəlif kommunikasiya kanallarından istifadə etməklə İKTA-ya müraciət edə bilərlər.
Qeyd edək ki, yazı müsabiqəsinin 2024-cü ilin 23-30 dekabr tarixlərini əhatə edən birinci mərhələdə 60-a yaxın iştirakçı uğurla qeydiyyatdan keçib.
Qeydiyyatdan keçən iştirakçılar “Telekommunikasiya sahəsində tənzimləyici çərçivə və informasiya təhlükəsizliyi məsələləri”, “İnternet telekommunikasiya infrastrukturundan istifadə imkanları, məlumatların əlçatanlığı və şəffaflığı” və “İnternetin xidmət keyfiyyətini müəyyən edən göstəricilər, sahə üzrə elektron xidmətlərin əlçatanlığı” mövzularından birini seçərək yazı hazırlamalıdırlar.
Aralarında jurnalistlərin, telekommunikasiya operator və provayderlərinin əməkdaşlarının, ali təhsil müəssisələrinin müəllim və tələbələrinin, müstəqil ekspertlərin, ayrı-ayrı dövlət və özəl müəssisələrdə çalışan şəxslərin də olduğu iştirakçılar yazılarını 31 yanvar 2025-ci il 18:00-dək qeydiyyatdan keçdikləri link vasitəsilə müsabiqə komissiyasına təqdim edə bilərlər.
Təqdim ediləcək yazıların hazırlanması zamanı iddiaçılar “İnternet telekommunikasiya xidməti sahəsində tənzimləyici çərçivənin hazırlıq səviyyəsinin təhlili”ndən yararlana bilərlər.
Müsabiqə şərtləri ilə burada tanış olmaq mümkündür.
Xatırladaq ki, müsabiqəyə təqdim edilən yazılar İKTA əməkdaşları və müstəqil ekspertlərdən ibarət münsiflər heyəti tərəfindən qiymətləndiriləcək. Qalibləri İKTA tərəfindən təqdim ediləcək mükafat və qiymətli hədiyyələr gözləyir.
