Alimlər WiLo adlı yeni texnologiya konsepsiyasını təqdim edərək Wi-Fi və LoRa uzunmənzilli şəbəkə protokolunu birləşdirən yeni hibrid texnologiya hazırlayıblar. WiLo-nun əsas məqsədi kənd təsərrüfatı və ya ağıllı şəhərlər üçün sensor sistemləri kimi, minimum enerji sərfiyyatı ilə uzun məsafələrə məlumat ötürülməsi tələb olunan Əşyaların İnterneti (IoT) şəbəkələrini dəstəkləməkdir.
Çinin Nankin Meşə Universitetinin İnformasiya Texnologiyaları və Elmləri Kollecindən professor Demin Qao izah edir ki, Wi-Fi bu gün məhdud diapazona malikdir və nisbətən böyük miqdarda enerji tələb edir. Eyni zamanda, LoRa texnologiyası aşağı enerji sərfiyyatı və uzun məsafələrə məlumat ötürmə qabiliyyəti ilə xarakterizə olunur ki, bu da onu IoT tətbiqləri üçün populyar edir.
Honq-Konq, Çin, Cənubi Koreya, ABŞ və Böyük Britaniya universitetlərinin nümayəndələrinin, eləcə də Almaniyadan olan Intel əməkdaşlarının daxil olduğu tədqiqat qrupu Semtech şirkətinin istehsalı olan standart LoRa SX1280 ötürücüdən istifadə edərək təcrübələrini həyata keçirib. 2.4 GHz diapazonu həm Wi-Fi, həm də bir sıra digər texnologiyalar tərəfindən istifadə olunsa da, Wi-Fi və LoRa birbaşa əlaqə saxlaya bilmir. Bu problemi həll etmək üçün alimlər Wi-Fi ötürmə tezliyini LoRa siqnallarına uyğunlaşdıran alqoritm hazırlayıblar.
Texniki tərəfdə, komanda LoRa (CSS) tərəfindən istifadə olunan uzun mənzilli siqnalları təqlid etmək üçün Wi-Fi data multiplexing (OFDM) standartını uyğunlaşdırdı. «Bu, standart Wi-Fi cihazlarına əlavə avadanlıq olmadan LoRa texnologiyasından istifadə edərək uzun məsafələrdə əlaqə saxlamağa imkan verir» dedi Gao. Həm qapalı, həm də açıq havada keçirilən sınaqlarda WiLo texnologiyası 500 metrə qədər məsafələrdə məlumatların ötürülməsində 96% müvəffəqiyyət nümayiş etdirdi.
Qeyd olunur ki, WiLo-nun əsas üstünlüklərindən biri texnologiyanın mövcud avadanlıqda idarə edilməsidir ki, bu da onun həyata keçirilməsinin xərclərini azaldır və miqyasını sadələşdirir. Bununla belə, çatışmazlıqlar da var. Xüsusilə, Wi-Fi-ın eyni vaxtda işləməsi və LoRa siqnallarının emulyasiyası üçün qurğular çox enerji sərf edir. Alimlər gələcəkdə WiLo-nun enerji səmərəliliyini, məlumat ötürmə sürətini və müdaxilə müqavimətini optimallaşdırmaqla bu problemi həll etməyi planlaşdırırlar. «Kommersiyalaşdırma istiqamətində növbəti addım sistemin daha da optimallaşdırılması, həmçinin müxtəlif IoT mühitlərində WiLo-nun sınaqdan keçirilməsi olacaq»-deyə Gao bildirib.
