Bu həftə SpaceX Starlink telekommunikasiya peyklərinin daha bir hissəsi orbitə çıxarıb, onların ümumi sayı kosmosda 7000-i ötüb. CelesTrak xidmətinin məlumatına görə, Yer orbitindəki aktiv peyklərin demək olar ki, üçdə ikisi İlon Maskın şirkətinin nəzarəti altındadır.
Hesabatda qeyd olunub ki, SpaceX hazırda aşağı Yer orbitində 6370 aktiv Starlink peykinə malikdir. Daha bir neçə yüz kosmik gəmi fəaliyyətsizdir və ya artıq orbiti tərk edib. 2019-cu ildə ilk buraxılışdan bəri Starlink orbital bürcü hər gün orta hesabla 3 peyk artır.
Beləliklə, SpaceX indi kosmik gəmilərin 62%-dən bir qədər çoxunu idarə edir. İlon Maskın şirkətinin ən yaxın rəqibi OneWeb 631 peykdən ibarət orbital bürcə malikdir. Maraqlıdır ki, 2022-ci ildə Roskosmos ilə əməkdaşlığa xitam verildikdən sonra OneWeb öz peyklərini kosmosa çıxarmaq üçün SpaceX raketlərindən istifadə edir.
SpaceX-in planlarına gəlincə, şirkət Yer kürəsinin hər yerində yüksəksürətli internetə çıxışı təmin etmək üçün orbitə 42 min peyk çıxarmaq niyyətindədir. Hazırda Starlink 3 milyona yaxın insanın şirkətin xidmətlərindən istifadə etdiyi 102 ölkədə internetə çıxış təmin edir. Starlink peyk İnternetinə qoşulmaq üçün xüsusi terminal tələb olunur və xidmətlərin qiyməti ayda təxminən 300 dollara başa gəlir. Gələcəkdə şirkət onlarla başqa ölkədə genişzolaqlı internetə çıxış xidmətləri göstərməyi planlaşdırır.
