Samsung yeni Galaxy Book5 seriyasının ilk noutbukunu – Galaxy Book5 Pro 360 modelini təqdim edib. Cihaz 360 dərəcə açıla bilən ekranla təchiz edilib. Noutbuk yeni Lunar Lake seriyasının Intel Core Ultra 5 və Core Ultra 7 prosessorları (Intel Evo modelləri daxil olmaqla) ilə təchiz edilmişdir.
Galaxy Book5 Pro 360 16:10 aspekt nisbəti, 500 cd/m² parlaqlıq, 2880 x 1800 piksel təsvir ölçüsünə dəstək, 120 Hz təzələmə tezliyi (VRR ilə) və 120% DCI-P3 rəng sahəsi əhatə edən 16 düymlük AMOLED sensor ekrana malikdir.
Yeni məhsul 16 və ya 32 GB operativ yaddaş (prosessor modelindən asılı olaraq), həmçinin 512 GB və ya 1 TB bərk disk təqdim edir. Noutbuk Full HD təsviri dəstəkləyən 2 meqapiksellik veb-kamera, iki mikrofon, Dolby Atmos dəstəyi ilə dörd dinamik (iki 5 Vt sabvufer və iki 3,3 Vt tvit), həmçinin işıqlandırılmış klaviatura ilə təchiz olunub.
Cihaz 76 Wh batareya ilə təchiz edilmişdir. Noutbuk Wi-Fi 7 və Bluetooth 5.4-ü dəstəkləyir. O, USB 3.2 Type-A portu, HDMI 2.1, iki Thunderbolt 4 (USB-C) portu, yaddaş kartı oxuyucusu və birləşmiş 3,5 mm audio çıxışı ilə təchiz olunub. Galaxy Book5 Pro 360 S Pen və 65W USB-C şarj cihazı ilə gəlir. Noutbukun ölçüləri 355,4 × 252,2 × 12,8 mm, çəkisi – 1,69 kq.
Samsung Galaxy Book5 Pro 360 bu ay Kanada, Fransa, Almaniya, Böyük Britaniya və ABŞ-da satışa çıxarılacaq. Yeni məhsulun qiyməti barədə məlumat verilmir.
