16 aprel 2024-cü il tarixində İnnovasiya və Rəqəmsal İnkişaf Agentliyi və “Huawei Global” şirkətinin rəhbər nümayəndələri arasında görüş baş tutub. Görüşdə İKT sahəsində mütəxəssislərin yetişdirilməsi mövzusunda əməkdaşlıq formatları müzakirə olunub.
Müzakirələrdə “Technest” təqaüd proqramı çərçivəsində İKT sahəsində insan kapitalının inkişaf etdirilməsi yönündə “Huawei Academy”-nin tədris resurslarından istifadə edilməsi, eləcə də şirkətin beynəlxalq sertifikasiya vauçerlərindən tələbələrin yararlanmaları kimi məsələlərə toxunulub. Eyni zamanda yerli gənclərimizin “Huawei ICT Competition”-da iştirak etməsini təşviq etmək üçün potenisal əməkdaşlıqlardan söz açılıb.
İnnovasiya və Rəqəmsal İnkişaf Agentliyinin sədri İnarə Vəliyeva bu əməkdaşlığın əhəmiyyətini vurğulayaraq, Azərbaycanda İKT bacarıqlarının gələcək mənzərəsinin formalaşmasında mühüm rol oynayacağını qeyd edib. “Huawei” şirkətinin Yaxın Şərq və Mərkəzi Asiya regionu üzrə vitse-prezidenti Xie Çao bildirib ki, İRİA və “Huawei” arasında baş tutacaq birgə təşəbbüslər öz transformativ təsirini ən yaxın zamanda göstərəcək.
Qeyd edək ki, gələcəkdə “Huawei” şirkətinin rəqəmsal transformasiya istiqamətində mövcud təcrübəsindən yararlanmaq üçün təlimlərin və təcrübə mübadiləsi proqramlarının həyata keçirilməsi planlaşdırılır.
