HUAWEI SpaceX kimi aşağı Yer orbitində öz peyk şəbəkəsin yerləşdirəcək.Buna həsr olunmuş təqdimat da keçirib.Şirkət Weibo-da xüsusi avadanlıqların ilk sınaq nəticələrini dərc edib və eyni zamanda belə texnologiyanın əsas üstünlükləri və çatışmazlıqları barədə danışıb.
Xüsusi peyk şəbəkəsinin sınaqdan keçirilməsi ilə bağlı təfərrüatları HUAWEI Simsiz Texnologiya Laboratoriyasının baş tədqiqatçısı Vanq Jun açıqlayıb. Təqdimatda göstərilən slayddan nəticə çıxarsaq, sınaq sessiyası zamanı yükləmə sürəti 660 Mbit/s-ə qədər olub.
Bundan əvvəl HUAWEI artıq Mate 60 Pro flaqman smartfonunu geostasionar peyklərə qoşulma funksiyası ilə təchiz edib. Lakin tənqidçilər deyirlər ki, bu cür avadanlıqların bir sıra çatışmazlıqları var: yüksək hündürlük əlaqə sürətini məhdudlaşdırır, əlaqədar avadanlıq və onun işə salınması isə baha başa gəlir. Aşağı orbitli peyklər daha kiçik və daha ucuzdur, həmçinin internetə daha sürətli çıxış təmin edir.
HUAWEI nümayəndələri ucqar ərazilərdə şəbəkəyə çıxışı təmin etmək üçün peyk rabitəsinin vacibliyini qeyd ediblər. Eyni zamanda, şirkət texnologiyanın əsas məhdudiyyəti kimi nisbətən aşağı örtük sıxlığını adlandırdı. Nümunə olaraq İlon Maskın “Starlink”i göstərildi – çoxlu sayda peyklərə baxmayaraq, onun əhatə dairəsinin böyük hissəsi okeana düşür. HUAWEI-nin aşağı orbit şəbəkəsi ilə bağlı buraxılış tarixi və digər təfərrüatlar açıqlanmayıb.
