İstehsalçı telefonun maqnit radiasiyasını azaldan yeniləmə yayımladıqdan sonra Fransa hakimiyyəti iPhone 12-nin satışına qoyulmuş qadağanı ləğv edib. Bu barədə qadağanı tətbiq edən Fransa Tezlik Agentliyi (ANFR) məlumat yayıb.
Apple bu yaxınlarda iOS17.1 əməliyyat sisteminə yeniləmə buraxdı. Smartfon əlinizdə və ya cibinizdə olanda onun buraxdığı elektromaqnit şüalanmanı azaltdığı iddia edilir. Lakin yeniləmə yalnız Fransanın Avropa hissəsində mövcuddur, ona görə də qadağa onun xaricdəki ərazilərində hələ də qüvvədədir.
ANFR sentyabr ayında iPhone 12-nin 5,74 Vt/kq (əllər və ya başla təmasda olduqda) elektromaqnit enerjisini udma dərəcəsinə malik olduğunu göstərən iki araşdırma apardı. Fransada bir saniyədə insan toxumasına nə qədər radiasiya təsir etdiyini göstərən bu göstəricinin 4 Vt/kq-dan çox olmaması standartı var.
Fransanın müvəqqəti qadağasından sonra Belçika tənzimləyiciləri də iPhone 12-nin sağlamlıq risklərini nəzərdən keçirməyə başladılar.
