Bu ayın əvvəlində “Meta” Platforms tərəfindən istifadəyə verilən “Threads” sosial şəbəkəsi yeni funksiyalar almağa davam edir. Bu dəfə tərtibatçılar istifadəçilərə izlədikləri insanların xronoloji mesaj lentinə baxmaq imkanı verəcək funksiyanın istifadəyə verilməsinin başlandığını elan etdilər. Bir çox rəyçinin fikrincə, bu əsas xüsusiyyət platformanın Twitter ilə həqiqətən rəqabət aparması üçün vacibdir.
Uzun müddətdir ki, “Twitter” bütün dünyada çoxlu sayda insan üçün aktual xəbərləri əldə etmək üçün bir vasitədir. İlon Mask sosial şəbəkəni satın aldıqdan sonra platformada ciddi dəyişikliklər başladı. Dəyişikliklər silsiləsinin sonuncusu sosial şəbəkənin loqosunun “X” simvoluna, domenin isə x.com-a dəyişdirilməsi olub, bu həftənin əvvəlində baş verib. Bunun fonunda Threads istifadəçi auditoriyasının diqqətini çəkməyə və insanların müvafiq xəbərləri əldə edə biləcəyi yeni məkana çevrilməyə çalışır.
Məlumatlara görə, istifadəçilərin xronoloji lentə daxil olmaq üçün Threads proqramını ən son versiyaya yeniləmələrinə ehtiyac olmayacaq. Yeni funksiya tədricən istifadəyə verilir və ictimaiyyətə təqdim edilməzdən əvvəl bir az vaxt lazımdır. Xronoloji lentin yerləşdirilməsinə başlandığını “Meta” şirkətinin rəhbəri Mark Zukerberq elan edib. Bundan əlavə, o, Threads-in tezliklə yazıları tərcümə edə biləcəyini açıqladı və əlavə etdi ki, proqram bundan sonra müntəzəm olaraq yeni funksiyalar almağa davam edəcək.
