21 iyul tarixində İnnovasiya və Rəqəmsal İnkişaf Agentliyinin “Technest” Təqaüd Proqramı və “ROOF Academic Training” tərəfindən təklif olunan “Talant” Təqaüd Proqramı”nın bağlanış mərasimi həyata keçirilib.
Bir sıra özəl və dövlət qurumunun nümayəndələrinin iştirak etdiyi tədbirdə dünya üzrə yüksək reytinqli universitetlərə təqaüd qazanan gənclər təltif olunub.
Proqram çərçivəsində proqrama müraciət edən 401 tələbə arasından 5 mərhələdən ibarət seçim prosesi nəticəsində10 tələbə seçilib və bu tələbələr dünyanın yüksək reytinqli universitetlərinə hazırlaşmaq və müraciət etmək üçün lazım olan bütün xidmətlərlə təmin edilib.
10 “Technest” təqaüdçüsündən 8-i öz təhsillərini MIT, Johns Hopkins, Warwick, NYU, University PSL, KAIST kimi dünya reytinqində ən nüfuzlu yerlərdə qərarlaşan universitetlərdə davam edəcəklər. 2 tələbə ilə bağlı isə təhsil ocaqlarından cavab gözlənilir.
Qeyd edək ki, proqram yüksək akademik potensialı olan gənclərin dünya üzrə yüksək reytinqli universitetlərə müraciət etmələrinə dəstək olmaq üçün nəzərdə tutulmuşdur. Proqram universitetlərə hazırlıq və müraciət prosesi üçün lazım olan xərcləri əhatə edir.
