«Google» ABŞ-ın 40 ştatının baş prokuroru tərəfindən qaldırılan qrup iddiasını həll etmək üçün 391,5 milyon dollar təzminat ödəməyə razılaşıb. İddianın müəllifləri sübut etdilər ki, İT nəhəngi istifadəçiləri «Google» hesabının parametrlərində yerin izlənilməsi seçimini söndürdükdən sonra məlumatların toplanması işi davam etdirilib.
Baş prokurorlar bildiriblər ki, hazırkı saziş ABŞ-da internet məxfiliyi sahəsində ən böyük sazişdir. Bu iş üzrə təhqiqat dörd ilə yaxın davam edib və şirkətin 2014-cü ildən 2020-ci ilə qədərki fəaliyyətini əhatə edib. Pul təzminatına əlavə olaraq, «Google» şirkətin istifadəçilərin yerini nə vaxt izlədiyi barədə əlavə məlumat verməyi öhdəsinə götürüb.
«Google»-un məlumatına görə, şirkət artıq istifadəçi məlumatlarının toplanması üçün istifadə edilən alqoritmlərdə bir sıra dəyişikliklər edib. Şirkət qeyd edib ki, təhqiqat başlayandan bəri istifadəçi məlumatlarının köhnəlmiş məxfilik siyasətinə yenidən baxılıb və ABŞ-ın mövcud qanunlarına uyğun olaraq ona bir sıra dəyişikliklər edilib.
Mənbə qeyd edir ki, hakimiyyətin məhdudlaşdırılmasında və İT nəhənglərinin biznes modellərinin tənzimlənməsində dövlətin rolu durmadan artır. Buna baxmayaraq, ABŞ Konqresi və sənaye tənzimləyiciləri istifadəçi məlumatlarının qorunması sahəsində federal qanunun qəbulu ilə bağlı razılığa gələ bilməyiblər.
