Avqustun 30-da Türkiyənin Samsun şəhərində “Teknofest 2022” Aerokosmik və Texnologiya Festivalının açılışı olacaq.
Rəqəmsal İnkişaf və Nəqliyyat Nazirliyinin təşkilatçılığı ilə ölkəmiz festivalda 300 kv.m ərazini əhatə edən stendlə təmsil olunacaq.
Xatırladaq ki, “Teknofest” tədbiri Türkiyə Respublikası Sənaye və Texnologiya Nazirliyinin və Selçuk Bayraktarın rəhbərlik etdiyi Türkiye Teknoloji Takımı Vakfının (T3 Vakfı) birgə təşkilatçılığı və qardaş ölkənin 60-dan çox dövlət qurumu, ali məktəbi və özəl şirkətinin tərəfdaşlığı ilə 2018-ci ildən etibarən hər il keçirilir.
26 – 29 may 2022-ci il tarixlərində “Teknofest” ilk dəfə Türkiyədən kənarda – Azərbaycanda keçirilib. “TEKNOFEST Azərbaycan” festivalını 300 minə yaxın ziyarətçi izləyib. Festival çərçivəsində 3 beynəlxalq tədbir və 8 texnoloji müsabiqə təşkil olunub. Məqsəd istedadlı gəncləri bir araya toplamaq, smart gəncliyin formalaşmasına təkan vermək və texnoloqlardan ibarət insan kapitalının məlumat bankını toplamaq idi.
