Bu il ali məktəblərə qəbul imtahanlarında yüksək nəticə göstərən 10 abituriyent mükafatlandırılıb.Modern.az İnformasiya Agentliyinin təşkilatçılığı və “Nar”-ın dəstəyi ilə baş tutan tədbirdə ölkə üzrə yüksək nəticə göstərən məzunlar ilk dəfə bir araya gəliblər.
Modern.az İnformasiya Agentliyinin təşəbbüsü ilə hər il keçirilən və artıq ənənə halını alan tədbirdə Milli Məclisin deputatları, Elm və Təhsil Nazirliyinin rəsmisi, tanınmış ictimaiyyət nümayəndələri və valideynlər iştirak ediblər.
Tədbirin məqsədi ölkə birincilərini ictimaiyyətə tanıtmaq, eyni zamanda, gələcək hədəflərində uğura çatmaq üçün onlara yardımçı olmaqdır.
Mükafatlandırma mərasimində ilin ən uğurlu abituriyenti adını qazanan 10 gəncə “Nar” operatoru adından müasir smartfonlar, mobil internet, xüsusi nömrələr və zənglər üçün 700 manatlıq balans təqdim edilib.
Tədbiri giriş nitqi ilə açan Elm və təhsil nazirinin müşaviri Elnur Nəsibov nazirlik adından gəncləri təbrik edib:
«Nazirlik adından abituriyentləri təbrik edirik. Ali təhsil bizim həyatımızda çox vacib məqamdır. Bu gün təhsil bizim üçün böyük nailiyyət hesab olunur. Bu, həmçinin məsuliyyət deməkdir. Gənclərimiz də bunu çox yaxşı başa düşürlər. Son illərdə nazirliyin üzərinə çox vacib məsələlər düşür. Bizim gənclərimizin yüksək nəticə əldə etməsi bizim üçün böyük uğur deməkdir. Dünyanın top universitetlərinə qəbul, bakalavr yerlərinin tam dolması bizim gələcəyə uğurlu addım atmağımızdan xəbər verir. Bu gün hər bir təhsil müəssisəsinin əsas vəzifəsi yüksək kadrlar yetişdirməkdir. Gənclərimizi təbrik edir, karyelarında uğur arzulayırıq».
“Nar” operatorunun ictimaiyyətlə əlaqələr üzrə rəhbəri Əziz Axundov abituriyentlərə gələcək həyatlarında müvəffəqiyyətlər arzulayıb:
“Bu il uğura imza atmış gənclərimizə “Nar” adından təşəkkür edirəm. Biz Modern İnformasiya Agentliyinin təşəbbüsü ilə hər il belə tədbirlər keçiririk. Gənclərimizin uğurları bizim üçün qürurvericidir. Məhz göstərdikləri yüksək əzmkarlıq və çalışqanlığa görə şagirdlərimizə təşəkkür edir, gələcək həyatlarında uğurlar arzu edirik”.
Daha sonra deputatlar çıxış edərək abituriyentlərə xoş arzu və istəklərini çatdırıblar.
Milli Məclisin Əmək və sosial siyasət komitəsinin sədri Musa Quliyev təbriklərə qoşularaq, gənclərin layiqli vətəndaş kimi yetişdiyini söyləyib:“Mən burada iştirak edən gənclərimizin daha böyük uğur qazanacaqlarına əminəm. Bizim qalib xalqın gələcəyi sizlərə əmanətdir. Tibb, təhlükəsizlik və digər sahələrdə ölkəmizi daha da irəli aparacağınıza əminik. Bu yolda sizə uğurlar diləyirəm”.
Deputat Rəşad Mahmudov vurğulayıb ki, qalib xalqın övladları olaraq, xaricdə təhsil alan tələbələrimiz başlarını uca tuta bilərlər:“31 il bundan əvvəl mən dövlət tərəfindən xaricdə təhsil alma şansı qazanmışdım. Təhsilimi tibb sahəsi üzrə qardaş Türkiyədə alırdım. Bizə ən yaxın ölkə olmasına baxmayaraq, Türkiyə də belə qəlbi sınıq idik. Məğlub olmuş xalqın nümayəndəsi olaraq, düşünürdük ki, bizim xaricdə təhsil almağımızın faydası olmayacaq. Amma bu gün hər şey dəyişib. Ona görə xalqımızın gələcəyi naminə, daha da güclənməsi üçün bizim sizin kimi gənclərə ehtiyacımız var. Ümid edirəm ki, gənclərimiz dünyanın problemlərini həll edə biləcək gücə sahib olacaqlar, sizə ümidlərimiz böyükdür”.
Deputat Soltan Məmmədov isə çıxışında qeyd edib ki, hazırda qarşıya qoyulan əsas hədəf insan kapitalının gücləndirilməsidir:
“Bu gün texnologiya inkişaf edir, istənilən inkişaf etmiş ölkədə təhsil, insan kapitalı dövlətin əsas təməlidir. Bu gün biz qazandığımız bütün uğurları, nailiyyətləri aldığımız təhsilə borcluyuq. Ölkəmizin daxildə, istərsə də xaricdə beynəlxalq platformalarda təmsil olunmasında gənclərimizin böyük rolu var. Buna görə də bu gün təhsil, bilik, davamlı təcrübə bizim əsas hədəflərimizdən olmalıdır”.
Sonra Milli Məclis üzvü Elşad Mirbəşirli gənclərimizin düzgün ixtisas seçimi etməsindən söz açıb
“Bu gün ixtisas seçimlərinə diqqət yetirdikdə görürük ki, gənclərimiz artıq əmək bazarlarını yaxşı bilirlər, həmçinin gələcəkdə ölkəmiz üçün hansı ixtisasların lazım olduğunu ayırd edirlər. Bu, artıq bizim uğurumuzdur. Biz Azərbycanın gələcəyini yaxşı kadrlara əmanət edəcəyimizdən əminik”.
Bakı şəhəri üzrə Təhsil idarəsinin müdir müavini Hüseyn Əsgərov da təbriklərə qoşularaq, gənclərə təhsil həyatında nailiyyətlər diləyib: «Onların hər birinin qələbəsi bizim qələbəmizdir. Gənclərimizin ən böyük uğuru onların təhsil almalarıdır. Bugünkü uğurlarımızı təhsilimizə borcluyuq».
Modern İnformasiya Agentliyinin təsisçisi Elşad Eyvazlı da öz növbəsində yüksək nəticə əldə edən gəncləri təbrik edib:
“Bu il uğur qazanan abituriyentlərə göstərdikləri əzmkarlığa görə təşəkkür edirik. Gənclərin uğur hekayələri hələ qabaqdadır. Buna görə də sizi gələcəkdə çətin sınaqlar gözləyir. Amma çətinliklərə baxmayaraq, gələcək tələbələrimizin universitet həyatlarının da qazanclı keçəcəyinə əminəm. Bizim keçirdiyimiz tədbir artıq ənənə halını alıb. Belə tədbirlərin gələcəkdə daha da çoxalacağına ümid edirik”.
Qonaqlar abituriyentləri şəxsən təbrik edərək, onların gələcəkdə ölkəmiz üçün uğurlu kadrlar olacaqlarına inandıqlarını söyləyiblər.
Yüksək nəticə göstərmiş abituriyentlər təəssüratlarını Modern.az-la bölüşüblər.
Bu il ölkəmizdə yeganə 700 bal toplayan məzun, 125 nömrəli tam orta məktəbin yetirməsi Nigar Ağazadə Ankarada təhsilini bitirdikdən sonra Azərbaycanda həkim olacağını deyib:
“İmtahanda 700 bal topladığıma görə çox sevinirəm. Bunun üçün ilk növbədə müəllimlərimə, valideynlərimə, mənə dəstək olan hər kəsə təşəkkürümü bildirirəm. Mən Türkiyə universitetini seçmişəm, amma bu o demək deyil ki, orada qalacam. Təhsilimi bitirdikdən sonra Azərbaycana qayıdacam, ölkəm üçün uğurlu kadrlardan olmaq istəyirəm. Bu gün zəhmətimin bəhrəsini görmək, müəllimlərimin verdikləri təhsilin qarşısında belə nəticə əldə etmək məni çox sevindirir”.
Ağcabədi rayonunun Rəncbərlər kənd orta məktəbinin məzunu Sadıqlı Nərmin də qazandığı nəticəyə görə sevincli olduğunu bildirib:
“Belə nəticə əldə etməyim zəhmətimin bəhrəsidir. Eyni zamanda mənə bu yolda dəstək olan hər kəsə təşəkkürümü bildirirəm. Təhsilimi uğurlu başa vurub, yaxşı bir işdə işləmək istəyirəm”.
Qeyd edək ki, təhsil Modern İnformasiya Agentliyinin və “Nar” operatorunun strategiyasının ən vacib istiqamətlərindən biridir. Gənclərdə oxumaq həvəsi oyatmaq, layiqli təhsil almaları üçün onlarda motivasiya yaratmaq mobil operatorun ən ümdə məqsədlərindəndir.
“Nar” hal-hazırda 2,2 milyon abunəçiyə yüksək keyfiyyətli rabitə xidmətləri göstərməkdədir. “Nar” son 3 ildə Müştəri Loyallığı İndeksinə görə ölkədə lider mobil operatordur. Mobil operator müştəriyönümlülük strategiyasına sadiq qalaraq sərfəli qiymət qarşılığında üstün xidmət təqdim edir.
