Hidrogenlə işləyən qatar Hydrogen-Hybrid Advanced Rail Vehicle for Innovation (HYBARI) Yaponiyanın JR East dəmir yolu şirkəti tərəfindən təqdim edilib. Yeni nəqliyyatın ilk sınaqları 2022-ci ilin martında başlayacaq.
Mühərrik, yanacaq çənindəki hidrogeni atmosfer oksigeni ilə birləşdirən kimyəvi reaksiya ilə işləyir və bu, böyük tutumlu akkumulyatorlarda saxlanılan elektrik enerjisini əldə etməyə imkan verir. Bu mühərriklərin işləməsi nəticəsində atmosferə zərərsiz su buxarı buraxılır və hidrogenlə bir dəfə yanacaq dolduranda belə qatarlar 140 kilometr məsafə qət edə bilir.
Hazırda JR East Yaponiyanın kənd yerlərində teplovozlardan istifadə edir ki, bu da hər il atmosferə təxminən 2,5 milyon ton karbon qazı buraxır. Dizel qatarlarının hidrogen qatarları ilə dəyişdirilməsi zərərli emissiyaların miqdarını əhəmiyyətli dərəcədə azaldacaq. 2030-cu ilə qədər JR East bu rəqəmi 50% azaltmağı və 2050-ci ilə qədər tamamilə karbon neytral şirkətə çevrilməyi planlaşdırır.
