“The Economic Times” yazır ki, Hindistan hökuməti və Elektronika və İnformasiya Texnologiyaları Nazirliyi qlobal bazarda «Android» və «iOS» sistemləri ilə rəqabət apara biləcək smartfonlar üçün öz əməliyyat sistemini yaratmaq niyyətindədir.
Bu mərhələdə rəsmilər Hindistan mobil ƏS-nin hazırlanmasında iştirak etmək istəyən startaplar və akademik institutlar axtarırlar. Hindistanın elektronika və informasiya texnologiyaları naziri Rajeev Çandrasekhar hesab edir ki, mobil cihaz bazarında başqa bir əməliyyat sisteminin mövcud olması üçün kifayət qədər yer var. Ölkə hökuməti layihənin gözlənilən vaxtını hələlik açıqlamayıb və ona nə qədər vəsaitin ayrılacağı barədə məlumat vermir. 2010-cu ildə Hindistan hökuməti ölkənin kompüter sistemlərində tətbiqinə yönəlmiş yeni PC ƏS-nin yaradılması üzərində işləyirdi, lakin layihə istənilən nəticəni vermədi.
Qeyd edək ki, bir çox dünya şöhrətli şirkətlər, o cümlədən «Samsung», «BlackBerry», «Palm» və «Microsof»t əməliyyat sistemi bazarında «Google» və «Apple» ilə rəqabət aparmağa çalışsalar da, cəhdləri uğurlu olmayıb. Hazırda «Android» və «iOS»-un yeganə əhəmiyyətli rəqibi «Huawei»-nin «HarmonyOS» sistemidir, lakin o, hələ də aparıcı mobil platformalarla tam qarşı-qarşıya gəlməkdən uzaqdır.
