Smartfonlar həmişə özündə telefon, pleyer, fotokamera, kitab, bank kartı və bir çox başqa şeyləri birləşdirən İsveçrə bıçağının analoqu olub. “Honor Play 4 Pro” smartfonunu təqdim etmiş “Huawei” şirkəti bu siyahıya, həmçinin temperaturun ölçülməsi üçün infraqırmızı sensor da əlavə edib.“ICTinfo.az” “hightech.plus” saytına istinadən yazır ki, pandemiyanın qızğın vaxtı Çinin “Huawei” şirkəti yeni “Honor Play 4 Pro” smartfonunu termometrlə təchiz edib ki, istənilən şəxs bir toxunuşla temperaturu yoxlaya bilsin. Bunun üçün sadəcə telefonu alın nahiyəsinə qoymaq, mobil proqramı işə salmaq və nəticəni gözləmək lazımdır.
“Honor Play 4 Pro” smartfonu 2400×1080 piksel təsvir ölçülü 6,57 düymlük ekran, “5G” dəstəkli “Kirin” prosessoru, 8 QB əməli yaddaş, 128 QB daxili yaddaş və 4200 milliamper/saat tutumlu akkumulyatorla təchiz edilib.
Hələ ki telefon yalnız Çində əlçatandır, termometrlə olan versiyanın qiyməti təxminən 422 dollardır, termometrsiz versiya isə 15 dollar ucuzdur.
