Nazirlər Kabinetinin qərarı ilə təsdiq edilmiş «Elektron kənd təsərrüfatı» informasiya sistemindən istifadə Qaydaları»na uyğun olaraq, Vergilər Nazirliyi ilə Kənd Təsərrüfatı Nazirliyi (KTN) arasında razılaşma sənədi imzalanıb.
Sənəd KTN-nin «Elektron kənd təsərrüfatı» informasiya sistemi (EKTİS) ilə Vergilər Nazirliyinin avtomatlaşdırılmış vergi informasiya sistemi (AVİS) arasında elektron məlumat mübadiləsini nəzərdə tutur. Razılığa əsasən, EKTİS ilə AVİS arasında elektron məlumat mübadiləsi «nöqtə-nöqtə» prinsipi üzrə həyata keçiriləcək, xüsusi qorunan rabitə kanalları vasitəsilə birbaşa tənzimlənəcək. Məlumat mübadiləsi zamanı sorğuların verilməsi və real vaxt rejimində cavablandırılması nəzərdə tutulub.
EKTİS-dən AVİS-ə sorğular kənd təsərrüfatı məhsullarının istehsalı ilə məşğul olan vergi ödəyicilərinə aid məlumatları əhatə edəcək. Bu məlumatlar vergi ödəyicilərinin (fiziki və hüquqi şəxsin) adı, eyniləşdirmə nömrəsi (VÖEN), ünvanı, hüquqi şəxslərin qanuni təmsilçisi, sahibkarların fəaliyyət növünün kodu kimi zəruri informasiyalardan ibarət olacaq. Mətn tipli məlumatların ötürülməsi zamanı UNICODE kod standartları tətbiq ediləcək. Razılaşmaya əsasən, tərəflər məlumatların müasir informasiya texnologiyalarından və tələb olunan həcmdə ötürülməsinə imkan verən texniki avadanlıqlardan istifadə edəcəklər. Qarşılıqlı əlaqəni həyata keçirmək üçün tətbiq olunan proqram təminatı universal məlumat formatlarını dəstəkləməli və standart mübadilə protokollarına əsaslanmalıdır. Kənd Təsərrüfatı Nazirliyi AVİS-ə qoşulmaqla kommersiya (vergi) sirrini təşkil edən məlumatlardan vergi qanunvericiliyinə uyğun olaraq istifadə edərkən, həmin məlumatların qorunmasına təminat verməyi öhdəsinə götürüb. Həmçinin, məlumatların mühafizəsi məqsədilə icazəsiz girişin və proqram texniki vasitələrin fəaliyyətini poza biləcək təsirlərin qarşısı alınacaq. Məlumatların mühafizə səviyyəsinin təmin edilməsinə daimi nəzarət həyata keçiriləcək.
Tərəflərin razılığına əsasən, informasiya mübadiləsi müvəqqəti olaraq digər formalarda da aparıla bilər. Texniki nasazlıq və digər səbəblərdən məlumat mübadiləsinin rabitə kanalları vasitəsilə aparılması mümkün olmadıqda, nasazlıq aradan qaldırılanadək digər elektron informasiya daşıyıcılarından istifadə ediləcək.
Avropa İttifaqının (Aİ) maliyyə dəstəyi ilə həyata keçirilən «Elektron kənd təsərrüfatı» informasiya sistemi aqrar sahədə idarəetmənin təkmilləşdirilməsi və institusional islahatların sürətləndirilməsi ilə bağlı tədbirlərin mühüm tərkib hissəsi hesab edilir. «E-hökumət» proqramına əsasən, idarəetmədə şəffaflığın və səmərəliliyin artırılmasına, sahibkarlara elektron xidmətlərin göstərilməsinə xidmət edən sistemin məlumatlarının müvafiq qurumların servislərinin portalları vasitəsilə ötürülməsi də nəzərdə tutulub.
EKTİS-in fəaliyyətinin əsas istiqamətlərindən biri də məhz digər dövlət orqanlarının informasiya sistemləri və ehtiyatları ilə inteqrasiyasından ibarətdir. Bu baxımdan, AVİS-lə EKTİS arasında yaradılan səmərəli əməkdaşlıq dövlət qurumları tərəfindən göstərilən elektron xidmətlərin inteqrasiyasına müsbət təsir edəcək, ölkəmizdə «E-hökumət» quruculuğu istiqamətində aparılan işlərə öz töhfəsini verəcək.
Məlumat üçün qeyd edək ki, 2006-cı ildən tətbiq edilən Avtomatlaşdırılmış Vergi İnformasiya Sistemi Azərbaycanda «Elektron hökumət» in qurulması istiqamətində həyata keçirilən mühüm layihələrdən biridir. Layihənin reallaşdırılması nəticəsində Azərbaycanın vergi xidməti təkcə MDB ölkələri arasında deyil, həmzinin Şərqi Avropada ən müasir informasiya texnologiyasına malik xidmətlərdən birinə çevrilib. Bu sistem kağız düvriyyəsinin aradan qaldırılması, nəzarət imkanlarının genişləndirilməsi, vergi ödəyiciləri ilə vergi orqanları arasında texnoloji elektron əlaqələrin yaradılması, digər dövlət strukturları ilə inteqrasiyanın möhkəmləndirilməsi və məlumat mübadiləsinin həyata keçirilməsi baxımından mükəmməl layihədir.
AVİS-in əsas məqsədi büdcənin mədaxil hissəsinin tam və vaxtında formalaşdırılması, çevik və səmərəli vergi inzibatçılığının həyata keçirilməsi üçün effektli informasiya dəstəyinin təmin edilməsi, Vergilər Nazirliyinin bütün strukturlarında vahid informasiya və məlumatların saxlanılması və emalı imkanının yaradılması, yerli vergi orqanlarının funksiyalarının avtomatlaşdırılması və eyni zamanda, dövlət qurumları ilə inteqrasiyanın həyata keçirilməsi və onlarla qarşılıqlı məlumat mübadiləsinin həyata keçirilməsindən ibarətdir.
