““Lisenziyalar və icazələr haqqında” Qanunla yaradılan elektron lisenziya portalı məmurla lisenziya alan sahibkar arasında olan şəxsi və subyektiv münasibətləri tamamilə aradan qaldıracaq. Hər bir lisenziya almaq istəyən sahibkar elektron portala daxil olmaqla özünə hesab açıb, fəaliyyət növünə uyğun olaraq lisenziya ala biləcək”. Bunu Milli Məclisin İqtisadi siyasət, sənaye və sahibkarlıq komitəsinin iclasında parlamentin İqtisadi Qanunvericilik şöbəsinin müdiri Rauf Hacıyev deyib.
“Bu portalla sahibkarlara lisensizyaların kağız şəklində verilməsinə son qoyulacaq. Onlara veriləcək lisenziyalar kod şəkilli olacaq. Kodu alan sahibkar bundan sonra onu yoxlayıcı orqana təqdim edəcək. Artıq bu bu gün “Lisenziyalar və icazələr haqqında” Qanunla lisenziyaların verilməsi qaydaları çox sadələşdirilir. Əvvəlki qanun layihəsindən fərqli olaraq, burada bütün proseslər ardıcıllıqla göstərilib. İstənilən sahibkar qanunla tanış olarsa, hansı addımların atılımasını artıq özü biləcək. Əsas məsələlərdən biri də bu qanunda lisenziya verən müvafiq icra hakimiyyəti orqanının məsuliyyət daşıması məsələsidir. Sənəddə lisenziyaların hansı müddətə verilməli olması, verilən lisenziyaların sahibkarların istehsal sahələrindəki standartlara uyğun gəlib-gəlməməsi məsələsi də yer alır.
Sahibkar istədiyi təqdirdə kağız formatda da lisenziyanı ala biləcək. Bildirişlər də artıq elektron qaydada, mobil telefona SMS və elektron poçt, yaxud poçt vasitəsilə göndəriləcək. Qanun layihəsinə edilən ən mühüm dəyişiklik lisenziyaların sayının 37-dən 36-ya endirilməsi ilə bağlıdır. “Əvvəllər Yabanı bitkilərin toplanması üçün də lisenziya tələb olunurdu. Edilən dəyişikliyə görə, bu fəaliyyət növü üçün lisenziya tələb olunmayacaq. Çünki, yabanı bitkilərdən dərman və ya ədviyyat kimi istifadə olunur»-deyə Rauf Hacıyev bilidirib.
