Azərbaycanda fəaliyyət göstərən GPS naviqasiya şirkətləri avtomobil sürücülərini bir neçə kateqoriyaya bölürlər. “Caspian NavTel”dən bildirilib ki, sürücülər daha çox tıxac, radar, ünvanların dəqiqliyi ilə maraqlanırlar. Şirkətin məlumatına görə, bununla bağlı sürücüləri müxtəlif qruplara ayırmaq olar.
Avtomobili ancaq şəhər daxili sürənlər tıxaclardan qaçmağa çalışır
Birinci qrup Bakıda ancaq şəhər daxili avtomobil idarə edən sürücülərdir.Belə sürücülər naviqasiya proqramında tıxacların olub-olmamasına diqqət yetirirlər.Sistem bu məlumatları əksər hallarda istifadəçiyə ötürə bilir.Belə ki, proqram avtomobillərin hərəkət sürəti 15-20 km/saata düşən yolları tıxac olaraq qeyd edir.Və sürücü getmək istədiyi yerə daha optimal variantı seçərək gedə bilir.
Rayonlara gedənlər radarları axtarır
Tez-tez rayonlara gedən sürücüləri isə daha çox radarlar maraqlandırır. Ona görə də sistemdə radarları axtarırlar.
Köhnə küçə adlarının dəyişməsi taksilərə problem yaradır
Taksi sürücüləri isə naviqatorda problem yarananda onun daha tez düzəldilkməsini tələb edirlər.Köhnə küçə adları yeni adlarla əvəzləndiyi üçün taksi sürücülərinin naviqatora daha çox ehtiyacı olur. Gecikmə isə onların işlərinə problem yaradır. Ona görə operativ təmir istəyirlər.
Xanım sürücülər manevr qaydalarından daha çox istifadə edir
Bir qrup avtomobil sahibi isə yol qaydalarına daha çox diqqət yetirir və sistemdə də əsasən bundan istifadə edir. Bu qrupa əsasən yeni sürücülük vəsiqəsi alanlar və xanımlar daxildi. Xanımlar sistemdə əsasən düzgün manevr qaydalarından istifadə edirlər.
Kuryer şirkətləri ünvanların dəqiqliyini istəyir
Ünvanların dəqiqliyi daha çox çatdırılma və kuryer xidməti göstərən şirkətlərə lazım olur.Hətta belə sürücülər sistem vasitəsilə yeni ünvanı tapa bilməyib özləri araşdırdıqda həmin ünvanı daha sonra proqrama əlavə edirlər.
Yerli turistlər xarici ölkələrin xəritələrini yükləyirlər
Yayda daha çox gəzməyi xoşlayanlar və xarici ölkələrə avtomobillə getmək istəyənlər isə həmin ölkələrin xəritələrini yükləyib səyahətə çıxırlar. Digər ölkələrin xəritələrini 2 formada yükləmək mümkündür. Pulsuz xəritələrdə əsasən ümumi göstəricilər və əsas yollar qeyd edilib. Pullu proqramda isə səyahət edilən yer haqqında daha detallı məlumatlar qeyd edilib. Yerli turistlər avtomobildən düşüb getdikləri yeri soraqlamamaq üçün pullu proqrama üstünlük verirlər. Ölkərlərin ərazisindən aslı olaraq xəritənin qiyməti də dəyişir.Məsələn, Gürcüstan üçün detallı naviqasiya xəritəsini 7,5 manat, Türkiyə üçün 75 manat, Rusiyanın bir vilayəti üçün 6-9 manat təşkil edir.
Şirkətdən verilən məlumata görə, hər gün 3 avtomobil sürücüsü naviqasiya sistemindən istifadə etməyə başlayır
