“App Annie” şirkəti mobil əlavələr bazarının inkişafı üzrə ilk hesabatını təqdim edib. Yeni hesabat sayəsində müəssisə, investor və əlavə tərtibatçıları yaxın beş il üçün qlobal imkanlar barədə proqnozla bağlı məlumat əldə edəcəklər.
“CNews” resursu yazır ki, şirkətin proqnozuna görə, 2016-cı ildə qlobal mobil əlavələr bazarının həcmi 24 faiz artacaq: bütün əlavələr mağazalarının ümumi gəliri 51 milyard dollara çatacaq. 2020-ci ilədək bütün əlavələr mağazaları üzrə qlobal ümumi gəlir göstəricisinin 101 milyard dolları ötəcəyi gözlənilir.
Proqnoza görə, iri bazarların, o cümlədən ABŞ, Yaponiya və Çinin əlavə gəlirlərində ümumi müsbət dinamikada əsas rol oynamasına baxmayaraq Hindistan, İndoneziya, Meksika və Argentina kimi sürətlə inkişaf edən bazarlar böyük imkanlar açacaq.
Şirkət analitiklərinin qiymətləndirməsinə görə, 2015-ci ilin əvvəlində tədarük həcminə görə irəliyə çıxan Çin bu ilin birinci rübündə əlavələr mağazalarının ümumi gəlir göstəricisi üzrə ABŞ-ı geridə qoyacaq.
Bununla yanaşı, gəlir və istifadə göstəriciləri 2015-ci ildə Argentina və Braziliya kimi ölkələrdə sürətli artımla təsdiq edilən böhran şəraitində dayanıqlıq əlamətləri nümayiş etdirir. Bu vəziyyət smartfon və əlavələr bazarının 2008-2010-cu illərdə yaşadığı dayanıqlıq dövrünü xatırladır.
