Yaponiyadan olan şirkətlər konsorsiumu altıncı nəsil (6G) mobil şəbəkələr üçün dünyanın ilk yüksəksürətli simsiz cihazını sınaqdan keçirib. Sınaqlar zamanı 90 metrdən çox məsafədə 100 Gbps məlumat ötürmə sürətinə nail olmaq mümkün olub ki, bu da 5G üçün maksimumdan ən azı 10 dəfə çoxdur.
100 Gbps sürətində, məsələn, bir saniyədə beş HD film ötürə bilərsiniz. Almaniyanın Statista şirkətinin məlumatına görə, bu, Amerikanın T-Mobile telekommunikasiya operatorunun 5G şəbəkələrindəki orta sürətdən 500 dəfəyə qədər yüksəkdir.
Yapon şirkətləri tərəfindən aparılan sınaq nəticələri göstərir ki, 6G simsiz cihazı 100 GHz diapazonundan istifadə etməklə daxili məkanda və 300 GHz diapazonundan istifadə edərək açıq havada 100 Gbit/s sürətlə məlumat ötürür. Cihaz 100 metr yüksəklikdə sınaqdan keçirilib.
5G şəbəkələrinin kommersiya istifadəsinə 2019-cu ildə başlanılıb. Hazırda bu standart ən müasir simsiz rabitə standartıdır və onun dəstəyi əksər müasir smartfonlarda tətbiq olunur. T-Mobile-ın 5G şəbəkələrində orta 5G qoşulma sürəti 204,9 Mbps, nəzəri cəhətdən əldə edilə bilən 5G limiti isə 10 Gbps-dir.
Bir çox ölkələrdə 5G-nin tətbiqinin hələ də tam başa çatmamasına baxmayaraq, alimlər artıq növbəti nəsil standartının yaradılması üzərində işləyirlər. 6G şəbəkələri üçün infrastruktur inkişaf mərhələsindədir və standartın kommersiya istifadəsinə növbəti onillikdə başlanılacağı gözlənilir.
5G və 6G arasındakı əsas fərq müxtəlif standartlara malik cihazlar tərəfindən istifadə edilən elektromaqnit spektrinin müxtəlif tezlik diapazonlarındadır. Daha yüksək diapazonlarda işləmək adətən daha yüksək sürət deməkdir. 6GWorld-ə görə, 5G şəbəkələri adətən sub-6GHz diapazonunda məlumat ötürür, lakin o, 40GHz-ə qədər genişlənə bilər. Nokia-ya görə, 6G şəbəkələri 100 GHz və 300 GHz arasında daha yüksək tezlik diapazonlarından istifadə edəcək. Daha yüksək tezlik diapazonlarından istifadə nəinki daha yüksək məlumat sürəti deməkdir, həm də siqnalların ötürülməsi və gücləndirilməsi üçün tamamilə yeni infrastrukturun yaradılması zərurəti deməkdir.
