Naxçıvan Muxtar Respublikası Rabitə və Yeni Texnologiyalar Nazirliyinin dəstəyi ilə Çin Xalq Respublikasının “Huawei” şirkəti tərəfindən “Naxçıvan” Universitetində Azərbaycanda ilk dəfə olaraq “Gələcəyin İKT sahəsindəki toxumları” adlı proqram-layihə həyata keçirilib.Həmin layihəyə əsasən Naxçıvandan olan 6 tələbə Çinin “Huawei” şirkətində istehsalat təcrübəsi keçəcək.
Tədbirdə Naxçıvan Muxtar Respublikası Rabitə və Yeni Texnologiyalar Nazirliyi ilə Naxçıvan Dövlət Universiteti və “Naxçıvan” Universiteti tərəfindən təyin olunmuş seçim komissiyasının sədri Elnur İbrahimov çıxış edərək qeyd edib ki, “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” Naxçıvan Muxtar Respublikası Ali Məclisi Sədrinin 2015-ci il 27 iyul tarixli Sərəncamı ilə Naxçıvan Dövlət Universitetinin və “Naxçıvan” Universitetinin bir sıra ixtisasları Rabitə və Yeni Texnologiyalar Nazirliyinin hamiliyinə verilib. Nazirlik tərəfindən bu istiqamətdə tədbirlər həyata keçirilir. Elnur İbrahimov onu da qeyd edib ki, Rabitə və Yeni Texnologiyalar Nazirliyi dünyanın informasiya-kommunikasiya texnologiyaları sahəsində aparıcı şirkətlərdən olan Çin Xalq Respublikasının “Huawei” şirkəti ilə uzun illərdir əməkdaşlıq edir. Bunun nəticəsində ötən ilin sentyabr ayında “Naxçıvan” Universitetində həmin şirkətin informasiya-kommunikasiya texnologiyaları mərkəzi yaradılıb. Mərkəzdə şirkətin avadanlığı, yeni nəsil modemlər və şəbəkə avadanlıqları nümayiş etdirilir. Qlobal İKT provayderi olan “Huavei” şirkətinin təşəbbüsü, Naxçıvan Muxtar Respublikası Rabitə və Yeni Texnologiyalar Nazirliyinin dəstəyi ilə Azərbaycanda ilk dəfə olaraq training proqramı həyata keçirilir,- deyən Elnur İbrahimov onu da vurğulayıb ki, Azərbaycanda bu proqrama qatılan universitetlər yalnız Naxçıvan Dövlət Universiteti və “Naxçıvan” Universitetidir. Bu proqram çərçivəsində komissiya üzvləri informasiya-kommunikasiya texnologiyaları sahəsində biliyə malik olan ən yaxşı 6 tələbəni seçərək və onları Çinə istehsalat təcrübəsinə göndərəcək. Çindəki 2 həftəlik proqram Pekində başlayacaq. Burada tələbələr Çin mədəniyyəti ilə tanış olacaqlar. Daha sonra tələbələr “Huavei” şirkətinin Şenzen yay təlim mərkəzində informasiya-kommunikasiya texnologiyalarının öyrənilməsi barədə təcrübə keçəcəklər.
Tədbirdə “Huawei” şirkətinin nümayəndəsi Fərhad Rzayev təmsil etdiyi şirkətin fəaliyyəti barədə də ətraflı məlumat verib. Daha sonra Naxçıvan Dövlət Universitetinin və “Naxçıvan” Universitetinin 13 tələbəsinin seçilmiş mövzular üzrə təqdimatı olub. Düşüncə və insanlarla ünsiyyət bacarığı, suallara cavab vermək mərhələləri üzrə ingilis dilində bilikləri yoxlanılıb. Sonda 6 tələbə “Huavei” şirkəti tərəfindən “Gözəl Azərbaycan” layihəsi çərçivəsində “Gələcək üçün toxumlar” müsabiqəsinin qalibi olub.Tədbirdə “Naxçıvan” Universitetinin rektoru, professor İsmayıl Əliyev müsabiqədə qalib gəlmiş “Naxçıvan” Universitetinin tələbələri Sənan Əhmədova, Əlişəms Cavadzadəyə, Qönçə Abduləliyevaya, Naxçıvan Dövlət Universitetinin tələbələri Rüstəm Məmmədova, İsmayıl Əliyevə və Səxavət Heydərliyə Çin Xalq Respublikasına getmək üçün dəvətnamələr təqdim edib.
