ABŞ-ın texnologiya nəhəngi Google və İtalya — ABŞ avtomobil istehsalçısı Fiat Chrysler (FCA), sürücüsüz avtomobil istehsal etmək üçün razılaşdıqlarını bildirib.
İki şirkətdən edilən birgə bəyanatda, FCA-nın bu il təxminən 100 ədəd 2017 model Chrysler Pacifica Hybrid avtomobil istehsal edəcəyi və Google-ın bu vasitələrin ABŞ yollarında sürücüsüz getməsi üçün lazımi proqram, sensor və təchizatı təmin edəcəyi bildirilib.
Açıqlamada, sözügedən avtomobillərin bu ilin sonlarında Google-ın sürücüsüz avtomobil sınaqlarında istifadə edilməyə başlanmasının planlaşdırdığı qeyd olunub.
FCA-nın İdarə Heyətinin sədri (İcraçı Direktor) Sergio Marchionne, açıqlamada, dünyanın ən böyük texnologiya şirkətlərindən biri olan Google-la əməkdaşlığın avtomobil sənayesində innovasiyanı sürətləndirəcəyini ifadə edərək, yeni texnologiya ilə həllərin avtomobil istehlakçılarına geniş fayda verəcəyini qeyd edib.
Google-ın Sürücüsüz Avtomobil Layihəsinin rəhbəri John Krafcik de, FCA ilə birgə əməkdaşlığın Google-ın sürücüsüz avtomobil inkişaf etdirmək layihəsini sürətləndirəcəyini vurğulayaraq, «Bu sayədə yollarımız daha təhlükəsiz olacaq» deyib.
ABŞ yollarında hər il təxminən 33 min adamın ölümünə səbəb olan qəzaların 94%-nin «insan səhvi» səbəbindən qaynaqlandığı bildirilən açıqlamada, sürücüsüz maşınların bu qəzalara mane olma potensialına malik olduğu ifadə edilib.
