Hər il 17 may tarixi bütün dünyada Ümumdünya Telekommunikasiya və İnformasiya Cəmiyyəti Günü kimi qeyd edilir.
Bu ümumbəşəri tarixin qeyd olunması sonradan Beynəlxalq Telekommunikasiya İttifaqı (BTİ) adlanan Beynəlxalq Teleqraf İttifaqının 17 may 1865-ci ildə əsasının qoyulması ilə bağlıdır. İnformasiya Cəmiyyəti üzrə Ümumdünya Sammitinin 2005-ci ildə Tunisdə keçirilən ikinci mərhələsi çərçivəsində BMT Baş Assambleyasına 17 may tarixinin “Beynəlxalq İnformasiya Cəmiyyəti Günü” elan edilməsi ilə bağlı müraciət qəbul edilir.
Beləliklə, BTİ 2006-cı ildə 17 may tarixinin Ümumdünya Telekommunikasiya və İnformasiya Cəmiyyəti Günü kimi qeyd edilməsi ilə bağlı qərar qəbul edir və hər il beynəlxalq səviyyədə dünyanın əksər ölkələrində bu tarix ilə əlaqədar müxtəlif tədbirlər keçirilir.
“Ümumdünya Telekommunikasiya və İnformasiya Cəmiyyəti Günü”nün əsas məqsədi İnternetdən və informasiya-kommunikasiya texnologiyalarından istifadənin cəmiyyət və ölkələrə verdiyi imkanlar, eyni zamanda rəqəmsal fərqin aradan qaldırılması ilə bağlı məlumatlılıq səviyyəsinin yüksəldilməsinə kömək göstərməkdir.
Cari ildə Ümumdünya Telekommunikasiya və İnformasiya Cəmiyyəti Günü “Hər kəs üçün süni intellektdən istifadənin müsbət nəticələrinin təmin olunması” mövzusuna həsr edilib.
BTİ-nin bəyanatında bildirilir ki, son illər ərzində böyük verilənlər, maşın təlimi, verilənlər anbarının hesablama gücü və bulud hesablamaları sahəsində əldə olunan yüksək nailiyyətlər nəticəsində süni intellekt texnologiyaları sahəsində əhəmiyyətli irəliləyişə nail olunub. Süni intellekt əsasında texnologiyalar artıq səhiyyə, təhsil, maliyyə, kənd təsərrüfatı, nəqliyyat və digər genişspektrli sahələrin təkmilləşdirilməsi nəticəsində insanların həyatının yaxşılaşdırılması üçün istifadə edilən perspektivli alətlərin və proqramların əsas komponenti olub.
15 may 2018-ci il tarixində İsveçrənin Cenevrə şəhərində, BTİ-nin qərargahında bu günə həsr olunmuş “Süni intellektin üstünlükləri” mövzusunda II Ümumdünya Sammiti öz işinə başlayıb. Tədbirdə əsas diqqət Birləşmiş Millətlər Təşkilatının davamlı inkişafı sahəsində hədəflərinə nail olunmasının sürətləndirilməsi üçün süni intellektin potensialından istifadə olunmasının təmini məsələlərinə ayrılıb.
Azərbaycan 1992-ci ildən BMT-nin İnformasiya və Kommunikasiya Texnologiyaları üzrə ixtisaslaşmış agentliyi – Beynəlxalq Telekommunikasiya İttifaqının üzvüdür. Təşkilatla əməkdaşlıq çərçivəsində müəyyən olunmuş bütün tələb və tövsiyələrə əməl olunur. Bu istiqamətdə Ümumdünya Telekommunikasiya və İnformasiya Cəmiyyəti Günü də ölkəmizdə geniş qeyd olunur.
Belə ki, bu tarixi gün ərəfəsində Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzində Azərbaycan Dövlət Neft və Sənaye Universitetinin tələbələri istehsalat təcrübəsinə cəlb olunublar. Tələbələr 3 ay ərzində təcrübə keçəcəklər. Onlara ilkin mərhələdə nazirliyin bütün qurumlarının fəaliyyətləri ilə tanış olmaq üçün şərait yaradılıb. Daha sonra tələbələr ixtisaslarına və istəklərinə uyğun olaraq təcrübə keçmək istədikləri qurumu seçiblər.
Bununla da yetişməkdə olan gənc kadrlar ali təhsil müəssisələrində öyrəndikləri nəzəri bilikləri praktiki işlərdə tətbiq etmək imkanı əldə edirlər. Tək 2018-ci ilin ötən dövrü ərzində Məlumat Hesablama Mərkəzində universitet və kolleclərdən 80-ə yaxın tələbə təcrübədən keçib. Təcrübə müddətində tələbələrlə həm komanda, həm də fərdi şəkildə işlər görülüb. Hər bir tələbənin individual bilik və bacarıqlarına uyğun tapşırıqlar verilib. Ehtiyac yarandıqda onlara mütəxəssislər tərəfindən köməklik də göstərilib.
Silsilə tədbirlərin davamı kimi Nəqliyyat, Rabitə və Yüksək Texnologiyalar Nazirliyi Yüksək Texnologiyalar Parkı tərəfindən “İdeyadan biznesə” layihəsi çərçivəsində Bakı şəhərindəki 23 nömrəli orta məktəbin şagirdləri üçün məlumatlandırıcı təlim və startap müsabiqəsi keçirilib.
Təlim çərçivəsində məktəblilər startap komandalarının formalaşması, layihə təqdimatının düzgün hazırlanması, investorlara layihənin satışı yolları, bazarın araşdırılması kimi məsələlərlə bağlı məlumatlandırılıb.
Eyni zamanda, ideyası olan məktəblilər arasında müsabiqə keçirilib. Birinci yerə “Silver Technology”, ikinci yerə “23 School Corporation”, üçüncü yerə isə “Algasoft” layiq görülüb, qaliblər mükafatlandırılıb.
Bundan başqa Nəqliyyat, Rabitə və Yüksək Texnologiyalar Nazirliyi, Heydər Əliyev Fondu, Təhsil Nazirliyi və Azərbaycan Milli Elmlər Akademiyasının İnformasiya Texnologiyaları İnstitutunun birgə təşkilatçılığı ilə “Ali məktəb tələbələri arasında İnformatika üzrə Ümumrespublika Olimpiadası” keçirilib.
Olimpiadada Bakı Mühəndislik Universiteti I yer, ADA Universiteti II yer, Bakı Dövlət Universiteti III yer, Azərbaycan Respublikasının Prezidenti yanında Dövlət İdarəçilik Akademiyası IV yer tutub. Bakı Ali Neft Məktəbi, Azərbaycan Texniki Universiteti, Azərbaycan Dövlət Aqrar Universiteti, M. V. Lomonosov adına Moskva Dövlət Universitetinin Bakı filialının tələbələri isə Fərqlənmə Sertifikatı ilə təltif olunub.
Qaliblərə bu gün Nəqliyyat, Rabitə və Yüksək Texnologiyalar Nazirliyinin “Fəxri Fərman” və “Diplom”ları, eləcə də sponsorların hədiyyələri təqdim olunacaq.
