Ötən ilin dekabr ayı ərzində “Elektron hökumət” portalı vasitəsi ilə ən çox istifadə olunan 20 xidmət üzrə ilk 5 elektron xidmətdən 3-ü Rabitə və Yüksək Texnologiyalar Nazirliyinin göstərdiyi e-xidmətlər olub.
Əmək və Əhalinin Sosial Müdafiəsi Nazirliyinin (ƏƏSMN) “Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi” xidməti 153958 istifadə sayına görə ilk mövqedə qərar tutub.
İkinci yerdə Rabitə və Yüksək Texnologiyalar Nazirliyinin (RYTN) “Telefon nömrəsi üzrə axtarış” (86372), üçüncü yerdə ƏƏSMN-in “Əmək müqaviləsi bildirişləri barədə məlumatların işçilər tərəfindən əldə edilməsi” (68528), dördüncü və beşinci yerlərdə RYTN-in “Mobil cihazların qeydiyyatdan keçirilməsi” (51658) və “Mobil cihazların IMEI kodunun yoxlanılması” (36076) xidmətləri qərarlaşıb.
Dövlət Sosial Müdafiə Fondunun (DSMF) “Sığortaolunanın onlayn uçota alınması” (22991), RYTN-in “Rabitə və kommunal xidmət haqlarının internet vasitəsilə ödənilməsi” (22363), “Elektron hökumət” portalının “Portal üzərindən istifadəçi qeydiyyatı” (19849), ƏƏSMN-in “İş yerinə dair arayış” (18710) və “Elektron hökumət” portalının “Vətəndaşa aid fərdi məlumatlar üzrə elektron arayışın verilməsi” (14677) xidmətləri də ən çox istifadə olunan e-xidmətlər sırasındadır.
Sonrakı mövqelərdə isə DSMF-nin “Əmək qabiliyyətinin müvəqqəti itirilməsinə görə müavinətlə bağlı haqq-hesab cədvəlinin təqdim edilməsi” (14502), “Sığortaolunanlara məlumatın verilməsi” (10178), “Uşağın üç yaş tamam olanadək ona qulluq etməyə görə müavinətlə bağlı haqq-hesab cədvəlinin təqdim edilməsi” (5494), “Uşağın anadan olmasına görə müavinətlə bağlı haqq-hesab cədvəlinin təqdim edilməsi” (4923), “Hamiləliyə və doğuma görə müavinətlə bağlı haqq-hesab cədvəlinin təqdim edilməsi” (4421) , “Elektron hökumət” portalının “Portal üzərindən verilmiş arayışların yoxlanılması” (4155), DSMF-nin “Pensiya kalkulyatoru” (4066), “Məcburi dövlət sosial sığorta vəsaitlərinin onlayn ödənilməsi” (3638), RYTN-in “AzDataCom internet xidmətinə qoşulma üçün sifariş” (3565) və DSMF-nin “Sığortaedənin uçot nömrəsinin öyrənilməsi” (3177) xidmətləri yer alıb.
