“Azercell Telekom” MMC-nin əməkdaşları “Karyera günləri” çərçivəsində növbəti dəfə Qafqaz Universitetinin tələbələri ilə görüşüblər. Qafqaz Universiteti ilə sıx əməkdaşlıq edən Azercell Telekom nümayəndələri ilk növbədə Azercell-də mövcud olan Tələbə Proqramları, o cümlədən “Yay Təcrübə Proqramı” haqqında tələbələrə ətraflı məlumat veriblər. Bildirilib ki, mayın 16-dan etibarən start götürən “Yay Təcrübə Proqramı”na artıq 400 – ə yaxın müraciət daxil olub ki, bu müraciətlər sırasında Qafqaz Universitetinin tələbələri üstünlük təşkil edir.Azercell nümayəndələri mərhələlərlə seçilən gənclərin 3 ay müddətində şirkətdə işləyib təcrübə qazanmaq imkanı qazandığını vurğulayiblar. “Yay Təcrübə Proqamı” nın ilk seçim mərhələsi təqdim olunan müraciət formalarının dəyərləndirilməsindən ibarətdir. Növbəti mərhələyə dəvət almış tələbələr və məzunlar müxtəlif testlər, çalışmalar və müsahibələr vasitəsilə şirkət nümayəndələri tərəfindən dəyərləndirilir. Dəyərləndirmələr zamanı tələbələr və məzunlar akademik fəaliyyətləri, ixtisas üzrə nəzəri bilikləri və maraqları sayəsində seçilir.Son seçim turu isə üz-üzə keçirilən müsahibələrdən ibarət olur.
Tələbə proqramları haqqında məlumatdan sonra, Azercell-də karyera qurmaq istəyən gənclərə məsləhətlər verilib və onların müraciətləri üçün xüsusi elektron ünvan yaradılıb. Azercell-də işə qəbul olunmaq arzusunda olanların bütün suallarını cavablandırıblar.
Qeyd etmək yerinə düşərdi ki, “Azercell” ilə Qafqaz Universiteti arasında neçə illik səmərəli əməkdaşlıq mövcuddur. Qafqaz Universitetinin tələbələri şirkətin innovativ Barama layihəsi çərçivəsində araşdırma aparıblar. Universitet tələbələri həmçinin, “Azercell”in Tələbə Təqaüdü proqramında da iştirak edirlər. Şirkətin mütəxəssisləri məhz Qafqaz Universitetinin tələbələri üçün Yeni Nəsil Texnologiyaları üzrə təlim keçir. Bundan əlavə, Qafqaz Universitetində ilk dəfə olaraq Azercell tərəfindən 4G laboratoriyası quraşdırılıb.
