ABŞ-ın Detroyt şəhərindən Hollandiyanın paytaxtı Amsterdama uçan, “Delta Airlines” aviaşirkətinə məxsus sərnişin təyyarəsi İngiltərənin Mançester hava limanına təcili eniş edib.İKT.lent.az-ın “ABC7” telekanalına istinadən verdiyi xəbərə görə, səbəb təyyarədə “Samsung” planşetinin alovlanması olub.Salonda tüstülənmə başladıqdan və kəskin yanıq qoxusu yayıldıqdan sonra pilotlar təcili enişə qərar veriblər. Məlum olub ki, iki oturacaq arasında qoyulmuş planşet kreslolardan birinin tənzimlənməsi zaman alışıb. Cihazın əvvəlki reysin sərnişinlərindən birinə məxsus olduğu güman edilir. Aviaşirkət planşetin “Samsung”un istehsalı olduğunu təsdiqləyib.Təyyarə Mançesterdə 3 saat qalıb. Yanğının nəticələri aradan qaldırıldıqdan sonra təyyarə yoluna davam edib.
Xatırladaq ki, “Samsung” şirkəti hazırda yeni “Galaxy Note 7” smartfonları ilə bağlı problemi həll etməklə məşğuldur. Bu smartfonlar satışa çıxdıqdan sonra məlum olub ki, onlar öz-özünə alışır və partlayır.
