Microsoftun bazar dəyəri 37 milyard dollar azalıb

Microsoftun bazar dəyəri 37 milyard dollar azalıb

Bu ilin ilk 3 ayında Microsoft-un mənfəəti və gəlirləri azalıb.
2016-nın ilk üç ayında Microsoft-un xalis mənfəəti, ötən ilin eyni dövrü ilə müqayisədə 25 faiz azalaraq 4,99 milyard dollardan 3,76 milyard dollara geriləyib.Şrkətin həmin dövrdə gəlirləri 5 faiz azalaraq 21,73 milyard dollardan 20,53 milyard dollara düşüb. Şirkətin bir səhmə düşən mənfəəti ötən ilin ilk 3 ayında 0,61 dollar idisə, bu ilin eyni dövründə 0,47 dollar olub.

Microsoft-un  İcraçı direktoru Satya Nadella etdiyi açıqlamada, şirkətin bulud (cloud) texnologiyası və Windows 10 əməliyyat sisteminin istifadəsində artım görüldüyünü qeyd edərək, inkişaf tempini qorumaq istəyən şirkətlərin Microsoft-un rəqəmsal texnologiyalarına daha çox üstünlük verdiyini ifadə edib.

Məlumatın açıqlanmasının ardından NASDAQ birjasında Microsoft-un səhmləri 7,2% və ya 4,7 dollar aşağı düşüb. Səhmin qiyməti  56,46 dollardan 51,78 dollara enib. Nəticədə də, Microsoft-un bazar dəyəri təxminən 37 milyard dollar azalaraq 409,5 milyard dollara düşüb. Microsoft Apple və Google-dən sonra ABŞ-ın 3-cü ən böyük şirkətidir. Microsoft-un 7,91 milyard səhmi var.