“Microsoft” şirkəti yeni “Xbox One X” oyun konsolunun beynəlxalq satışına başlanıldığını elan etdi. İstehsalçı qeyd etdiyi kimi bu, tarixdə “Xbox” konsolunun ən genişmiqyaslı buraxılışıdır. Artıq “Xbox One X” 35 ölkədə əlçatandır. 
“Ictinfo.az” “ferra.ru” saytına istinadən bildirir ki,“AMD Jaguar” arxitekturası ilə işləyən oyun konsolu səkkiz nüvəli prosessorla təchiz edilib. Qurğunun qrafik məhsuldarlığı 6 teraflopsa yaxındır: “GPU” 40 hesablama blokuna malikdir və 1172 MHs takt tezliyində işləyir. Bütün bu xüsusiyyətlər nəticəsində sözügedən konsol rəqibləri arasında ən güclüdür.
Şirkətin nümayəndələrinin sözlərinə görə, yeni oyun konsolu ona qurulmuş 6 teraflops gücündə qrafik kart sayəsində “4K” təsvir ölçülü və 60 fps kadrlar tezliyində olan oyunları işə salmağa imkan verəcək. Müqayisə üçün, “PS4 Pro” oyun konsolunun məhsuldarlığı 4,2 teraflops təşkil edir. Bundan başqa, “Xbox One X” konsolu “Microsoft”un ən yığcam oyun konsoludur. Sözügedən konsol “Xbox One S” üçün əlçatan bütün aksessuarları dəstəkləyir.
“Xbox One X” oyun konsolunun qiyməti 499 dollar təşkil edir.
