2015-ci ilin oktyabr-dekabr aylarında “Microsoft” korporasiyası 2,5 milyon ədəd “Surface” planşeti tədarük edib.
“digitimes.com” nəşrinin məlumata görə, nəticədə ötən il ərzində tədarük olunan bu cihazların sayı 6 milyon ədədə çatıb. Bazarda isə bu məhsulların 4 milyon ədəd tədarük olunacağı gözlənilirdi.
IDC araşdırmalar şirkətinin qiymətləndirməsinə görə, ötən ilin dördüncü rübündə “Microsoft Surface” seriyasından olan planşetlər bütün dünyada 1,6 milyon ədəd satılıb. Burada da “Surface Pro”nun və daha ucuz model olan “Surface 3”ün payı böyükdür.
Müqayisə üçün bildirək ki, həmin müddət ərzində “Apple iPad Pro” planşetlərinin satışı 2 milyon ədəddən bir az çox olub.
“DigiTimes” proqnozlaşdırır ki, bu il “Microsoft” planşet tədarükünü 30 faiz artıracaq və 8 milyon ədəd nüsxəyə çatdıracaq. Nəşrin məlumatına görə, ABŞ korporasiyası digər istehsalçılarla birgə əməkdaşlıq edərək, artıq yeni “Surface” planşetlərinin yeni modellərinin tərtibatına başlayıb. Bu məhsulların bu ilin ikinci yarısında istehsala başlayacağı gözlənilir.
“Surface” planşetlərinə olduqca böyük maraq digər kompüter istehsalçılarını buna oxşar yeni modellərin tərtibatını həyata keçirməyə məcbur edir. Bunlardan birini “CES 2016” sərgisində HP şirkəti təqdim edib. Bu, “Intel Core M vPro” prosessora və “Gorilla Glass 4” müdafiəli 12 düymlük displeyə malik “Elite x2” hibrid planşetidir.
