Smartfon və planşetlərin köməyilə internetə daxil olan istifadəçilərin sayı ilk dəfə fərdi kompüter (FK) və noutbuklar vasitəsilə internetə daxil olan istifadəçilərin sayını ötüb. Bu haqda “StatCounter” statistika xidmətinin məlumatlarına istinadən “Phone Arena” nəşri məlumat yayıb.”ICTnews” “newsru.ru” saytına istinadən yazır ki, şirkətin hesabatına əsasən, 2016-cı ilin oktyabrında istifadəçilərin 48.7%-i internetə FK, 51.3%-i isə mobil qurğular vasitəsilə daxil olublar.
7 il ərzində mobil texnologiyalar belə böyük uğura imza atıblar: 2009-cu ildə internet auditoriyasının, demək olar, 100%-ni FK istifadəçiləri təşkil edirdi. “Phone Arena” nəşri qeyd edir ki, auditoriyalar nisbətinin dəyişilməsi inkişaf etməkdə olan ölkələrdə yaşayan smartfon və planşet istifadəçilərinin sayəsində baş verib, çünki onlar internetə çıxış üçün iki müxtəlif qurğudan istifadə imkanına malik deyillər. Amma inkişaf etmiş ölkələrdə (məsələn, ABŞ) FK hələ də mobil qurğulardan populyardır, amma onlar arasında fərq tədricən azalır.
Tədqiqatın nəticələrini şərh edən “StatCounter” xidmətinin icraçı direktoru Odan Kallen bildirib ki, bu məlumat sayt sahibləri üçün vacib siqnaldır, onlar resurslarının mobil qurğular üçün uyğunlaşdırıldığına əmin olmalıdırlar. O xatırladıb ki, “Google” mobil qurğudan axtarış zamanı mobil qurğulara uyğunlaşdırılmış saytlara üstünlük verir.
