“Huawei” şirkəti gələn il Azərbaycanın bölgələrində distant təhsil sistemini tətbiq etmək niyyətindədir

“Huawei” şirkəti gələn il Azərbaycanın bölgələrində distant təhsil sistemini tətbiq etmək niyyətindədir

“Huawei” şirkətinin distant təhsil sistemi artıq Naxçıvanda tətbiq olunub. Azərbaycanda təhsilə böyük önəm verildiyini nəzərə alaraq, gələn ildən digər bölgələrdə də bu sistemi tətbiq etmək istəyirik.
Bu barədə “Huawei” şirkətinin xarici işlər üzrə regional direktoru Xu Xiaobo məlumat verib.
Şirkət “Bakutel-2017” sərgisində dörd bölmədə yeni həllərini təqdim edir. “Birinci bölmədə distant təhsil sistemi nümayiş olunur ki, biz onun vasitəsilə ucqar kəndlərdə təhsil alan tələbələrə kömək edə biləcəyik. Həmin tələbələr şəhərlərdəki ilə eyni səviyyədə təhsil alacaqlar. Onlara bütün məlumatlar, tədris materialları internetdə bu sistem vasitəsilə ötürüləcək”, – deyə Xu Xiaobo bildirib.
O qeyd edib ki, digər bölmədə müasir IPTV olan “Smart Home” nümayiş olunur. Bu qurğu ilə istənilən mobil telefonu avtomatik olaraq televizora qoşmaq mümkündür. Eyni zamanda, televiziya kanallarını dəyişmək üçün yarım saniyə vaxt sərf edilir. Bundan əlavə, bir neçə telekanalı eyni vaxtda izləmək olur.
Şirkətin sərgidəki stendinin digər bölməsində “Smart Sity” – “ağıllı şəhər” təqdim olunur. Başqa bir həll isə neft-qaz istehsalı üçün nəzərdə tutulub. Bu barədə danışan regional direktor deyib: “Neft-qaz Azərbaycanın ən mühüm sənaye sahəsidir. Müasir “Əşyaların interneti” adlanan texnologiyaların köməyi ilə neft hasilatının effektivliyini artırmaq olar. Dörd distant müşahidə sistemi vasitəsilə təhlükəsizliyə nəzarət etmək və gözlənilən təhlükələri aşkarlamaq olar”.