27 sentyabr 2016-cı il tarixində “Google” korporasiyasının yaranmasının 18-ci ili tamam olur. Bu münasibətlə axtarış sisteminin əsas səhifəsində bayram loqotipi yerləşdirilib.“ICTnews” Elektron Xəbər Xidməti “searchengines.ru” saytına istinadən yazır ki, istifadəçi həmin loqotipin üzərinə sıxdıqda “Google-un ad günü nə vaxtdır” sorğusu üzrə axtarış nəticələrindən ibarət səhifəyə yönləndiriləcək.
“Google.com” domeni 15 sentyabr 1997-ci il tarixində Stenford Universitetinin tələbələri Larri Peyc və Serqey Brin tərəfindən qeydiyyatdan keçirilib. Axtarış sisteminin adı təsadüfən seçilməyib: şirkətin adı bir və yüz ədəd sıfırdan ibarət sayı ifadə edən (10 üstü 100) “googol” ingilis sözünün təhrif olunmuş formasıdır.
“Google” şirkəti rəsmən 4 sentyabr 1998-ci il tarixində təsis edilib, amma bəzən yaranma tarixini həm 7, həm də 27 sentyabr tarixində qeyd edir.
