“İTE – Təhsildə İnnovativ Texnologiyalar” əlavə təhsil mərkəzi Azərbaycan üzrə rəsmi nümayəndə olaraq, UNESCO-nun “Gələcək üçün Təhsil” layihəsinin tərkib hissəsi olan GlobalLab layihəsinin yerli təhsil mühitində tanınması və müəllimlərin bu təhsil platformasına cəlb olunması məqsədilə artıq ötən tədris ilindən bir çox məktəbdə təqdimatlar həyata keçirməyə başlamış, onların bu platformada aktiv iştirakına yüksək dəstək göstərmişdir.
Belə ki, platformanın açıqladığı son statistik məlumata əsasən, Azərbaycan müəllimləri 2015-2016-cı il reytinqinə görə dünya ölkələri sırasında 3-cü sıradadır. Layihə rəhbərləri hesabatda dövlət dili rus dilindən tamamilə fərqli olan Azərbaycanın bu uğurunu şərh edərkən xoş təəccüblərini gizlədə bilməyiblər:
– “Azərbaycan müəllimləri aktivliyinə görə hətta rus dili ikinci rəsmi dövlət dili olan Belarusdan və Qazaxıstandan irəli keçməyi bacarıblar. Bu çox böyük göstəricidir”
Hesabata əsasən müəllimlərinin platformadakı sayına və aktivliyinə görə ölkələrin sıralaması aşağıdakı kimidir:
- Rusiya
- Ukrayna
- Azərbaycan
- Qazaxstan
- Amerika Birləşmiş Ştatları
- Belarus
- Almaniya
- Qırğızıstan
- Moldova
- Böyük Britaniya
Xatırladaq ki, GlobalLab bütün yaş kateqoriyalı tədqiqatçıları birləşdirən icmadır. İcmanın əsas məqsədi bilik qazanma və tədqiqat bacarıqlarının inkişafına dəstəkdir. GlobalLab, icma üzvlərinə məlumatın axtarılması, analiz olunması və sistemləşdirilməsi, təhlillərin elmi şəkildə əsaslandırılması istiqamətləri üzrə faydalı vərdiş və bacarıqların formalaşmasında kömək edir. İcma üzvləri dünyanın müxtəlif ölkələrindən olan həmkarları ilə xüsusi tədqiqat, tədris və elmi layihələrdə iştirak, həmçinin layihələrin icrasını həyata keçirmək imkanı əldə edirlər.
Qeyd edək ki, GlobalLab, “İTE – Təhsildə İnnovativ Texnologiyalar” əlavə təhsil mərkəzinin Azərbaycanda pedaqoji heyətin daha da təkmilləşməsi, təhsil sahəsində dünya praktikasının və innovativ metodların tətbiqi məqsədi ilə həyata keçirdiyi beynəlxalq əməkdaşlıq layihələrindən biridir.
