Yəqin ictimai nəqliyyatda gedərkən oturub telefonla məşğul olan şəxsə onun başının üstündə dayananların maraqla baxması mənzərəsi ilə qarşılaşmısınız.Hətta yaxınlıq o qədər olur ki,istifadəçinin kimə nə yazdığını da görə bilirlər.
“Ictinfo.az” “tass.ru”-ya istinadən bildirir ki,vəziyyətdən unikal yolla çıxış tapan “Google” şirkətinin tədqiqatçıları istifadəçini onun çiyni üzərindən telefon ekranına baxan şəxslər haqqında xəbərdar edən proqram hazırlayıblar. Şirkətin məlumatına görə, kompüter təlimindən istifadə edən proqram təminatı qurğu sahibi olmayan və ekrana baxan şəxsin sifətinin müəyyənləşdirilməsi üçün smartfonun ön kamerasını tətbiq edir. 
Proqram real vaxt rejimində istifadəçini smartfon ekranında yad şəxsin mətn oxuması və ya internet səhifəsini izləməsi barədə xəbərdar edir.
Tədqiqatçıların dərc etdiyi videoda “Google Hangouts” messencerində aparılan yazışmanın smartfonun ön kamerası tərəfindən ekrana baxan tanış olmayan insanlar aşkarlanan zaman dəfələrlə dayandırılmasını görmək mümkündür. Yad insanın üzü qırmızı çərçivəyə alınır, sifətin aşağı hissəsində isə istifadəçinin xəbərdarlığı dəqiq görməsi üçün rəngli zolaq əmələ gəlir. Bundan başqa, ekranda “A STRANGER IS LOOKING ALERT!!!” bildirişi görünür.Məlumata görə, hazırda funksiyanın işinin texniki xüsusiyyətləri haqqında ətraflı məlumat verilməsə də, əminliklə demək olar ki, proqram təminatı qurğu sahibi olmayan insanların sifətini tanıya və gözlərinin vəziyyətini izləyə bilir.
