“Azərkosmos” ASC-nin Peyk və yerüstü sistemlər departamentinin Peyk operatoru Səfurə Mirzəyeva Avropa İttifaqının Erasmus Mundus tələbə mübadilə proqramının SpaceMaster – Fəza Elmləri və Texnologiyaları üzrə magistr proqramı – çərçivəsində təhsil almaq üçün təqaüdə layiq görülüb. Səfurə bu il dünya üzrə adıçəkilən təqaüdə layiq görülmüş doqquz tələbədən biridir.
2016-2017-ci tədris ilindən etibarən təhsilinə başlayacaq S.Mirzəyeva ikiillik təhsil proqramının ilk ilində Almaniyanın Vürzburq Universiteti və İsveçin Lulea Texnologiya Universitetində təhsil alacaq.
O, Bakı Dövlət Universitetinin tətbiqi riyaziyyat fakültəsini bitirib, “Azərkosmos”
yarandığı ilk gündən şirkətdə fəaliyyət göstərib və Malayziyanın Measat və ABŞ-ın “Orbital Sciences Corporation” şirkətlərində keçirilmiş peyk idarəçiliyinə dair təlimlərdə iştirak edib.
“Azərkosmos” ASC haqqında
Qafqazda yeganə peyk operatoru olan “Azərkosmos” ASC telekommunikasiya və coğrafi kəşfiyyat sahələri üçün yüksək keyfiyyətli peyk xidmətləri təqdim edir. 2013-cü ilin fevral ayında orbitə buraxılan və Azərkosmos tərəfindən idarə edilən Azerspace-1 peyki 46° şərq uzunluğu orbital mövqeyində yerləşir və Avropa, Afrika, Yaxın Şərq, Qafqaz və Mərkəzi Asiya regionlarını əhatə edir. Ən azı 15 il müddətində orbitdə fəaliyyət göstərəcək peykin faydalı yükü 36 transponderdən ibarətdir: C diapazonda 24, Ku diapazonda 12 transponder. 2014-cü ilin dekabr ayından etibarən Azərkosmos sayca ikinci, təyinatına görə yüksək ayırdetməli (1.5 m ayırdetmə) Yer səthinin məsafədən müşahidə peyki olan Azersky-ın idarəçiliyini təhvil almış və bununla da geoinformasiya xidmətləri də daxil olmaqla Yer səthinin məsafədən müşahidəsinin kommersiya fəaliyyətinə başlamışdır. Şirkətin strateji inkişaf planlarına əhatə dairəsinin və xidmətlər spektrinin genişləndirilməsi daxildir. Bu məqsədlə, Azərkosmos 2017-ci ildə ikinci telekommunikasiya peyki Azerspace-2-ni 45° şərq uzunluğu orbital mövqeyinə çıxarmağı və önümüzdəki illərdə çox yüksək ayırdetməli Yer səthinin məsafədən müşahidə peykini əldə etməyi planlaşdırır. Daha ətraflı məlumatı www.azercosmos.cominternet səhifəsindən ala bilərsiniz.
